Любіць ня любіць

Аглядальнік UPI лічыць, што Лукашэнка на тым тыдні, падчас сустрэчы ў Маскве з расейскім прэзыдэнтам Пуціным, фактычна пагадзіўся на далучэньне Беларусі да Расеі. А Лукашэнка ў аўторак і сераду двойчы сустрэўся з дэлегацыяй амэрыканскіх кангрэсмэнаў і гучна заявіў пра “новую эру ў беларуска-амэрыканскіх адносінах”. Не, далібог, замежнапалітычны курс Беларусі мяняецца намнога часьцей, чым ветрык у маі.

Суд у Воршы

Аршанец Юры Конышка судзіцца з тамтэйшай тэлекампа-ніяй “Скіф”. Ён падаваў платную аб’яву пра шэсьце на Дзяды, а яе не паказалі. Цяпер ён хоча спагнаць з кампаніі грошы за аб’яву і кампэнсацыю за маральныя страты. Традыцыйна шэсьце йдзе да Кабыляцкай гары, дзе ў часе сталінскіх рэпрэсіяў былі расстраляныя некалькі сотняў чалавек. Паводле назіраньняў гледачоў, за ўвесь час існаваньня “Скіфу” ў этэр не было прапушчана ніводнай аб’явы па-беларуску. Раней гэта тлумачылася адсутнасьцю беларускамоўных дыктараў.

Усім неабыякавым

Зінаіда Ганчар, Ульляна Захаранка, Вольга і Сьвятлана Завадзкія ды Ірына Красоўская заклікалі ўсіх неабыякавых людзей 10 сьнежня, у Міжнародны дзень правоў чалавека, сабрацца а 12-й на менскай Кастрычніцкай плошчы, каб яшчэ раз нагадаць уладам пра зьніклых людзей. Жанчыны мяркуюць, што заклік не супярэчыць закону, і не зьвярталіся ў гарвыканкам па дазвол.

Сомы і “боты”

Парлямэнтары братняй нам Кіргізіі ўзаконілі “водкуп” ад службы ў войску. Каштаваць гэта будзе 25 тыс. сомаў (трохі больш за мільён рублёў).

Біскуп нелегальна-мігранцкі

Кіраўнік украінскае грэка-каталіцкае царквы кардынал Любамір Гузар выправіць у Італію біскупа, які будзе апекавацца ўкраінскімі нелегальнымі імігрантамі. На ягоную думку, іх колькасьць можа дасягаць мільёна.

Б.Т.