Грамадзкі аргкамітэт па сьвяткаваньні 750-годзьдзя каранацыі Міндоўга на сваім паседжаньні 16 студзеня вырашыў далучыцца да дзяржаўных мерапрыемстваў, але і дадаць багата сваіх. Была прынятая праграма сьвяткаваньня, якая складаецца з 18 пунктаў.
Пляны ў сяброў аргкамітэту, які ўзначальвае гісторык Анатоль Грыцкевіч, напалеонаўскія. Найперш — дамагчыся, каб у Наваградку зьявілася вуліца Міндоўга і цэнтральная плошча гораду таксама насіла ягонае імя. Па вайне ў Наваградку існавала вуліца Міндоўга, але недзе ў 70-х яе пераназвалі. Гэткія ж вуліцы мусяць зьявіцца і ў іншых гарадох і мястэчках Беларусі. У самім Наваградку, як зазначыў мастак Мікола Купава, трэба ўпарадкаваць гару Міндоўга і закласьці помнік князю. Паставіць помнік сёлета нерэальна — яго няма яшчэ і ў праекце. Праспэкт Міндоўга і помнік вялікаму князю, як было вырашана на паседжаньні, мусяць таксама зьявіцца і ў Менску.
Яшчэ адзін крок дзеля ўшанаваньня памяці вялікага князя і караля — патрабаваньне афіцыйна вярнуць першай сталіцы ВКЛ найменьне Наваградак.
Сьвяткаваньні не абмяжуюцца толькі прапановамі перайменаваньняў ды закладкай помнікаў. Пройдуць выставы дзіцячай творчасьці і твораў сяброў Саюзу мастакоў. 5 альбо 6 ліпеня (як удасца арандаваць залю) адбудзецца ўрачыстае паседжаньне і сьвяточны канцэрт. Аргкамітэт пастанавіў дбаць пра выпуск памятнай юбілейнай манэты, а таксама адмысловых канвэрта і маркі, прысьвечаных Міндоўгавай каранацыі.
Апроч таго, было вырашана дамагчыся ад кіраўніцтва Опэрнага тэатру аднаўленьня опэры «Князь Наваградзкі». Пастаноўка, якая вытрывала ўсяго некалькі паказаў на пачатку 90-х, была зьнятая, калі кіраўніком тэатру стаў Сяргей Картэс. Сёньня ўсе дэкарацыі і тэатральныя касьцюмы ўжо зьнішчаныя, але опэру можна аднавіць у канцэртным выкананьні. Сябры грамадзкага аргкамітэту лічаць, што менавіта сымбалічным «Князем Наваградзкім» мусіць пачацца ўвосень новы опэрны сэзон.
Юбілейныя сьвяткаваньні з нагоды Міндоўгавай каранацыі зацягнуцца амаль на паўгоду. Яно і добра: ня кожны ж год выпадае такі знакавы юбілей.
Адам Воршыч
