31 студзеня
Баравікова Р. Вячэра манэкенаў: Апавяданьні. — Менск: Мастацкая літаратура, 2002. — 186 с.
Кніга апавяданьняў былой галоўнай рэдактаркі часопісу «Алеся» й новай галоўнай рэдактаркі часопісу «Маладосць» Раісы Баравіковай напісаная ў жанры псыхалягічнай фантастыкі. У «Кнігарні пісьменьніка» прыдбаць зборнік можна за 2700 руб.
Бязьлепкіна А. Ляўша на тэнісным корце: Аповесьці і апавяданьні. — Менск: Беларускі кнігазбор, 2002. — 352 с.
Аўтарка гэтай густоўна аформленай кнігі — студэнтка філялягічнага факультэту БДУ. Піша яна лёгкія ды займальныя па сюжэце тэксты, у тым ліку й дэтэктыўнага жанру. Галоўная гераіня зьмешчанай у зборніку аповесьці «Ўльляна, або Нарадзі ў сабе гейшу», таксама студэнтка філфаку й літаратарка-пачаткоўка, заўважыла: «Найвялікшая мара — каб мае творы чыталі ў мэтро». З такога гледзішча кніга Аксаны Бязьлепкінай — бясспрэчна ўдалая. У кнігарні «Веды» цана выданьня блізу 4000 руб. Наклад — 500 асобнікаў.
Гарэцкі Г. Выбранае. — Менск: Беларускі кнігазбор, 2002. — 544 с.: іл.
22-я кніга з сэрыі «Беларускі кнігазбор» упершыню пад адною вокладкаю зьбірае навуковыя працы, публіцыстыку, успаміны ды эпісталярную спадчыну дзеяча нацыянальнага руху ХХ ст., геоляга, географа, эканаміста Гаўрылы Гарэцкага. У зборніку перадрукоўваецца «Маскоўска-беларускі слоўнік» братоў Максіма і Гаўрылы Гарэцкіх, які пабачыў сьвет у 1918 г. у Смаленску і ад таго часу не перавыдаваўся. Кніга зьмяшчае таксама ўспаміны Гаўрылы Гарэцкага пра брата. У менскіх кнігарнях выданьне каштуе каля 5500 руб.
Зарэцкі М. Кветка пажоўклая: Апавяданьні, аповесьць / Уклад. Н.Семашкевіч. — Менск: Мастацкая літаратура, 2002. — 431 с.
У кнігу выбраных твораў аднаго з самых таленавітых беларускіх празаікаў 20—30-х ХХ ст., чыё жыцьцё абарвалі сталінскія рэпрэсіі, увайшлі апавяданьні, а таксама да сёньня належна не ацэненая нашым літаратуразнаўствам аповесьць «Голы зьвер». Знайсьці выданьне можна ў «Сьветачы», «Цэнтральнай кнігарні», «Кнігарні пісьменьніка». Цана — 4500 руб.
Іканапіс Заходняга Палесься ХVI—ХІХ ст. — Менск: Беларуская навука, 2002. — 349 с.: іл.
Багата ілюстраванае выданьне распавядае пра фармаваньне ў Заходнім Палесьсі самабытнай іканапіснай школы ды яе галоўныя мастацкія адзнакі. Матэрыялы для кнігі зьбіраліся цягам 25 гадоў: навуковыя экспэдыцыі адмыслова наведалі многія каталіцкія й праваслаўныя храмы Палесься. Шукайце ў «Цэнтральнай кнігарні» й «Акадэмкнізе».
Тэатральная Беларусь: Энцыкляпэдыя: У 2 т. Т. 1. — Менск: БелЭн, 2002. — 568 с.: іл.
Гэтая энцыкляпэдыя — першае галіновае навукова-даведачнае выданьне па тэатральным мастацтве Беларусі: драматычным, музычным, лялечным. Яна ахоплівае гісторыю беларускага тэатру ад старажытнасьці да сёньня. Асобныя артыкулы прысьвячаюцца самым значным пастаноўкам беларускіх тэатраў — п’есам, опэрам, балетам, апэрэтам. Набыць энцыкляпэдыю можна ў «Акадэмкнізе» ды «Сьветачы». Цана — каля 13 тыс. рублёў.
Романовский И., Гудов М. Антисоветское подполье в Беларуси в 1919—1925 г. — Менск: РВВШ БДУ, 2002. — 127 с.
Аўтары разглядаюць умовы палітычнай і ўзброенай барацьбы, што разгортвалася ў Беларусі цягам 1919—25 г. — у вызначальны для станаўленьня дзяржаўнасьці пэрыяд. У кнізе шырока прадстаўленыя зьвесткі пра ідэі розных палітычных партыяў адносна беларускага дзяржавабудаўніцтва. Асобны разьдзел прысьвячаецца антыбальшавіцкім паўстаньням. Наклад выданьня — 200 ас., цана ў «Акадэмкнізе» — 3200 руб.
Падрыхтавала Тацяна Вабішчэвіч
