14 акругаў з 30 —безальтэрнатыўныя

71 чалавек выказаў намер балятавацца ў дэпутаты Гарадзенскага гарcавету. Пасьля рэгістрацыі засталіся 53 кандыдаты. З гэтай колькасьці 14 прэтэндэнтаў на дэпутацкі мандат будуць абраныя на безальтэрнатыўнай аснове. Усяго ў гарсавеце павінна быць 30 «слугаў народу».

Не прайшлі рэгістрацыі самыя вядомыя дзеячы апазыцыі. Сярод іх доктар мэдыцынскіх навук, прафэсар Алесь Астроўскі, старшыня абласной арганізацыі БНФ Сяргей Мальчык, кіраўнік гарадзкой арганізацыі Фронту Аляксандар Міхальчык, актывісты партыі Мікола Воран, Раман Юргель. У той жа час кандыдатамі ў дэпутаты зарэгістраваныя іх паплечнікі Вадзім Саранчукоў, Валеры Кісель, Мікалай Лемяноўскі, Сяргей Антусевіч, Аляксандар Антанюк, прадпрымальнік Франц Мамуль...

Найчасьцей прычынамі адмовы ў рэгістрацыі сталі хібы ў падпісных лістах, няслушнасьць дадзеных, пазначаных у дэклярацыях.

На думку Сяргея Мальчыка, адмова рэгістраваць лідэраў апазыцыі — заплянаваная ўладамі акцыя. Партыя БНФ аформіла вылучэньне сваіх кандыдатаў у дэпутаты гарсавету ад партыі. Камісія ж зьвярнулася ў інстанцыі з патрабаваньнем пацьвердзіць легітымнасьць гарадзкой арганізацыі партыі БНФ.

Пошук праўды ў абласным упраўленьні юстыцыі скончыўся нічым, хоць чыноўнікі Цэнтравыбаркаму й Міністэрства юстыцыі ў тэлефонных размовах адназначна пагадзіліся з абсурднасьцю прычыны, паводле якой гарадзенскія вылучэнцы Партыі БНФ не зарэгістраваныя кандыдатамі ў дэпутаты.

Зьвяртае на сябе ўвагу і тое, што 44 чалавекі ад апазыцыйных грамадзкіх аб’яднаньняў Горадні ня ўключаныя ў склад участковых выбарчых камісіяў гораду і вобласьці. Найперш гэта прадстаўнікі БНФ (33 асобы) і Беларускага Хельсынскага камітэту (4).

Антон Лабовіч, Горадня