05.02.2004
Спынены імпарт электраэнэргіі
1 лютага былі цалкам спыненыя пастаўкі электраэнэргіі з Расеі. Летась электрычнасьць куплялі ў Расеі па $1,68 за кВт/г. Сёлета расейскія вытворцы выставілі «Белэнэрга» тарыф $2,16. Беларусы палічылі, што таньней абыдзецца вырабляць энэргію на сваім мазуце. «Белэнэрга» мае намер купляць украінскую ці латвійскую энэргію. Украінцы маюць лішкі ўвесь час, а «Латвэнэрга» — у часе паводак на Дзьвіне. Штогоду Беларусь спажывае каля 34 млрд кВт/г энэргіі, 26 млрд зь іх яна прадукуе сама.
У найбліжэйшыя гады мяркуецца на заходнія крэдыты пабудаваць ГЭС на Нёмане і вугальную ЦЭЦ у Берасьці. У Менску ж выпрацоўваць электраэнэргію плянуюць са сьмецьця. На месцы былога канцлягеру «Трасьцянец» з дапамогай нямецкай фірмы «УПМ» мае паўстаць завод для перапрацоўкі сьмецьця пры нізкіх тэмпэратурах.
Можна пазычаць у далярах
Канстытуцыйны суд прызнаў адпаведнымі Канстытуцыі палажэньні Грамадзянскага кодэксу, згодна зь якімі замежная валюта можа быць прадметам дамовы пазыкі. Гэта пакладзе канец супярэчлівай судовай практыцы, калі часам такія пазыкі абвяшчаліся юрыдычна несапраўднымі і грошы канфіскоўваліся. Грамадзяне могуць выкарыстоўваць валюту для пазыкаў, іх вяртаньня і атрыманьня працэнтаў за карыстаньне пазыкамі.
Рост цэнаў на газ і электрыку
Мінэканомікі задняй датай — з 1 студзеня — падвысіла цэны на электраэнэргію, цяпло й газ для суб’ектаў гаспадараньня, адпаведна на 22,9%, 22,9% і 24,2% (да $56,8 за 1 тыс. кубоў). Ільготы захаваныя толькі для вясковых прадпрыемстваў.
«Альфа» адмаўляецца ад «Комплексбанку»
У «МенскКомплексБанку» завяршыла працу часовая адміністрацыя Нацбанку. Яна была ўведзеная для паляпшэньня фінансавага стану і трымалася пяць месяцаў. Банк мае сам шукаць інвэстараў, якія маглі б палепшыць яго фінансавы стан. Раней на кантрольны пакет акцый банку прэтэндаваў расейскі «Альфа-Банк», аднак цяпер ён адрокся такой ідэі.
Ліквідацыя банкаў
Шэсьць з паловай гадоў доўжылася ліквідацыя «Чысьцьінвэстбанку». Цяпер працэдуру банкруцтва ці ліквідацыі праходзяць «БелБалтыя», «БелКамБанк» и «Беларускі Біржавы Банк».
«Юкас» верне Мажэйкяй?
Расейскі канцэрн «Юкас» разглядае магчымасьць продажу Літве 53,8% акцый нафтаперапрацоўчага заводу ў Мажэйкяй. Такую заяву зрабіў прадстаўнік канцэрну на перамовах з старшынём Сойму Літвы. Вільню непакоіў лёс нафтаперапрацоўкі ў сьвятле канфлікту «Юкасу» з Крамлём.
МБ; БелаПАН; радыё «Свабода»
