Здаўна змагаліся паміж сабою на аўтамабільных трасах гоншчыцкая дынастыя Вальянаў і каманда «Чырвоны лідэр».
Але ўдача, як правіла, не спрыяла апошняй. Помсьцячы за свайго бацьку, які заўсёды ведаў толькі горыч паразы, дачка — цяперашняя кіраўніца «Лідэраў» — вырашае ўзяць рэванш любой цаной…
Удосталь наздымаўшы аўтагонак па вуліцах Марсэлю ў камэдыйнай кінатрылёгіі «Таксі», Люк Бэсон вырашыў зрабіць «сур’ёзны фільм» на гэтую тэму. Праўда, рэжысурай мэтар даўно не займаецца, дык і пастаноўку стужкі «Мішэль Вальян: прага хуткасьці» ён даверыў Люі Паскалю-Кувэлеру, а сам узяўся за сцэнар. Пад рукой была грунтоўная першакрыніца — папулярны ў Францыі комікс пра непераможнага аўтагоншчыка. Але Бэсон палічыў за лепшае ўсю сюжэтную лінію прыдумаць самастойна. Відаць, дарма…
Бэсонаўскі фільм пра аўтагонкі цяжка не параўноўваць з апошнімі галівудзкімі напрацоўкамі на гэтую тэму — «Скрасьці за 60 сэкунд», «Фарсажам» і яго сыквэлам. Можна было чакаць, што французы прайграюць у якасьці і размаху камбінаваных здымак (так яно і адбылося), але, як ні дзіўна, нават немудрагелістая фабула амэрыканскіх стужак выглядае больш праўдападобнай і прапрацаванай, чым аповед пра Мішэля Вальяна. І «драйву», безь якога такія фільмы трацяць сэнс, у Бэсона і K° яўна недастаткова, каб кампэнсаваць слабасьць сцэнару.
Іван Пятроў
