Супраць астатніх кіраўнікоў дэмакратычных сілаў улада выставіла па два супернікі: ад вэртыкалі і ад ЛДПБ на адцяжку галасоў.
Лідэры беларускае апазыцыі ўсе вылучаліся ў менскіх акругах. Старшыня Народнай грамады Мікола Статкевіч балятуецца ў дэпутаты па Каліноўскай акрузе №108 (як і на выбарах 2000 г., калі ён прайграў). Ініцыятыўная група здала за свайго лідэра больш за 1100 подпісаў і сутыкнулася зь неспадзяванкай: галоўным супернікам па акрузе выступаў намесьнік старшыні Партыі БНФ Юры Хадыка . Лукашэнкаўцы вырашылі спрэчку «Пяцёркі+» і «Эўрапейскай кааліцыі» ўласнай воляй: Ю.Хадыку з дыстанцыі зьнялі. Міколу Статкевічу давядзецца змагацца за мандат зь дзейным дэпутатам палаты прадстаўнікоў Вольгай Абрамавай , на якую робяць стаўкі ўлады. У дадатак па акрузе вылучаецца галоўны доктар першай клінічнай больніцы Менску Мікалай Сердзючэнка .
Старшыня Аб’яднанай грамадзянскай партыі Анатоль Лябедзька таксама аддаў перавагу не Ашмяне, ад якой абіраўся ў Вярхоўны Савет XIII скліканьня, а Сухараўскай акрузе №102 сталіцы. Схема «адзін апазыцыянэр — два прадстаўнікі ўлады» скарыстаная і там. Апазыцыйнаму палітыку давядзецца сутыкнуцца з загадчыцай упраўленьня сацыяльнай дапамогі гарвыканкаму Ірынай Аляксанавай , за чыёй сьпінай — увесь адміністрацыйны рэсурс. Раскрутка прэтэндэнткі на канале СТВ пачалася ўжо раніцай 16 верасьня, хаця паводле закону агітацыю можна пачынаць толькі з 17 верасьня. Трэці ў акрузе — прадстаўнік лібэрал-дэмакратаў.
Старшыня Партыі БНФ Вінцук Вячорка зарэгістраваны па Ўсходняй акрузе №107 Менску. Галоўным супернікам В.Вячоркі зьяўляецца член савету рэспублікі бізнэсовец Уладзімер Крук і сябар ЛДП грузчык Яўген Даронін .
(…)
Лідэр Партыі камуністаў Сяргей Калякін , як і астатнія апазыцыйныя лідэры, супернічае з двума кандыдатамі, абодва — выкладчыкі Нацыянальнага тэхнічнага ўнівэрсытэту. У Коласаўскай акрузе №106 Менску акрамя С.Калякіна ідуць намесьнік старшыні БСДГ Валер Арцішэўскі і дэкан архітэктурна-будаўнічага факультэту БНТУ Галіна Палянская , якая называецца кандыдатам ад улады.
(…)
Нефармальнага лідэра дэпутацкае групы «Рэспубліка» генэрала Валера Фралова ў Масюкоўшчынскай акрузе «разьвялі» на дэклярацыях.
(…)
Па-за гульнёй апынуўся і кіраўнік Беларускай сацыял-дэмакратычнай грамады Станіслаў Шушкевіч . Падстава — у ягонай акрузе няма зарэгістраванае партыйнае суполкі.
Такі ж лёс напаткаў і старшыню ліквідаванае Партыі працы Аляксандра Бухвостава , які спрабаваў вылучыцца кандыдатам у дэпутаты па 95-й Васьняцоўскай акрузе.
Поўнасьцю гэты артыкул можна прачытаць у папяровай і pdf-вэрсіі "Нашай Нівы"
Глеб Хмяльніцкі
