Экс-рэктар БДУ Аляксандар Казулін стварае рух «Воля народу». Яго падтрымлівае газэта «Народная воля». Лукашэнка разьюшана рэагуе на зьяўленьне Казуліна на палітычнай сцэне падчас «нарады па пытаньнях карупцыі». Незалежнае грамадзтва расколатае ў стаўленьні да Казуліна. Прапануем рэпартаж зь першага публічнага зьяўленьня Казуліна ў новай якасьці, інтэрвію зь ім і камэнтары.
«НН»: Вас практычна цэлы год не было на грамадзка-палітычнай арэне. Чым вы займаліся?
Аляксандар Казулін: А што, вы лічыце, што не павінна быць пэрыяду асэнсаваньня свайго ўласнага жыцьця, свайго ўласнага шляху?
«НН»: Вы называлі сябе «чалавекам прэзыдэнта». Цяпер Вы фактычна ідзяце супраць яго…
АК: Я іду ня супраць яго, а ў дапамогу.
«НН»: Не зважаючы на тое, што Лукашэнка ясна даў зразумець, што пойдзе на трэці тэрмін?
АК: Гэта яго права прымаць рашэньне. Кожны прымае рашэньне, мае права выбару. Пытаньне ў тым, ці адпавядаюць гэтыя рашэньні волі народу, ці адпавядаюць яны будучаму разьвіцьцю.
«НН»: Вам цяпер не шкада, што пры Вас у БДУ перастаў існаваць Свабодны прафсаюз студэнтаў?..
АК: Нічога падобнага! Што не пры мне — сто працэнтаў. (Свабодны прафсаюз студэнтаў у БДУ перастаў існаваць у 2000 г. пасьля ўціску на яго актывістаў з боку адміністрацыі ўнівэрсытэту. — АШ.)
«НН»: Вы сябе лічыце прарасейскім палітыкам ці праэўрапейскім?
АК: Я не называю сябе ні прарасейскім, ні праэўрапейскім. Я называю сябе беларускім палітыкам.
«НН»: На прэзыдэнцкіх выбарах 2001 г. Вас называлі магчымым кандыдатам. Ці зьбіраліся вы тады насамрэч ісьці ў прэзыдэнты?
АК: Паміж магчымасьцю і вынікам — вялікая розьніца. Ад намераў да дзеяньняў вялікая адлегласьць. У нас ёсьць шмат людзей з намерамі. І няшмат людзей зь дзеяньнямі.
Поўны варыянт чытайце ў папяровай і pdf-вэрсіі газэты "Наша Ніва"