Найгоршаю навіною летась для Маленькага Хлопчыка стала жаданьне даішнага чыноўніцтва ўвесьці новыя аўтамабільныя нумары.
Прыйшла навіна, крыху патрэслася ў паветры і зьнікла. У нас у краіне ўвогуле не прынята ўсеагульна абмяркоўваць такія пытаньні. Маўчала дзяржтэлерадыё і аднолькава зь ім дзяржаўная ды недзяржаўная прэса. І ён, наш Маленькі Хлопчык, стараўся маўчаць, каб, крый божа, не сурочыць — можа, забыліся?..
Так мінаў час. Зіма… вясна… Аж пакуль аднаго дня на Прывакзальнай плошчы, стоячы ля акна аўтобуса, ён не разгледзеў па-над літарамі BY на яшчэ новай бляшанцы чырвона-зялёны сьцяжок.
Маленькаму Хлопчыку стала вельмі шкада. Так, нібы ў яго забралі любімую цацку. Бо бел-чырвона-белыя аўтамабільныя нумары заставаліся ў ягоным жыцьці амаль адзінай незабароненай, няхай і стылізаванай, выяваю бел-чырвона-белага сьцяга.
З нумароў зьдзекаваліся даўно. Спачатку вось прымушалі малюначак «Пагоні» заклейваць налепкай. Лёс гэтых нумароў вырашыўся, на жаль, яшчэ на рэфэрэндуме 1995 году. Але чаму, чаму іх замянілі менавіта зараз?!
Шкада стала і беларускае адметнасьці, якая цяпер страцілася між шэрагу чорна-белых нумароў сярод чорна-белых людзей. А бывала ж, беларусаў заўважаў за паўвуліцы і ў Кіеве, і Варшаве і з аднолькавай радасьцю ўздымаў правую руку, каб павітаць.
Абурае (але аднаму абурацца не выпадае), што новыя аўтамабільныя «зоны» — нумары абласьцей, пазначаныя апошняй лічбай, пранумараваны ў парадку не беларускай, а расейскай мовы. І шкада, што пра такія дробязі мала хто задумваецца.
Галіна Дубовая, форум www.nn.by
