Гарадзенскім дзяўчатам роўных няма
«Алімпія» (Горадня) чацьвёрты раз запар выйграла жаночы чэмпіянат Беларусі па баскетболе. У фінальнай сэрыі да трох перамог каманда перамагла барысаўскую «Бярэзіну-БДАФК» — 3:0. Някепскія шанцы на чэмпіёнства маюць і гарадзенцы-мужчыны. 15 красавіка пачынаюцца паўфіналы ў нацыянальным першынстве. «Горадня-93» гуляе зь віцебскім «Лякаматывам-КіС», а менскі «Віталюр» — з асіповіцкім АЗАА. Сэрыя — таксама да трох перамог.
Старт чэмпіянату
У найбліжэйшыя выхадныя стартуе чэмпіянат Беларусі па футболе. У суботу будуць згуляныя чатыры матчы: МТЗ-РІПА (Менск) — «Дынама» (Менск), «Шахцёр» (Салігорск) — БАТЭ (Барысаў), «Славія» (Мазыр) — «Тарпэда» (Жодзіна), «Дняпро-Трансмаш» — «Гомель». У нядзелю пройдуць тры астатнія паядынкі: «Дынама» (Берасьце) — «Дарыда» (Ждановічы), «Лякаматыў» (Менск) — «Зорка-ВА-БДУ» (Менск), «Нёман» (Горадня) — «Нафтан» (Наваполацак).
Паводле рашэньня Беларускай фэдэрацыі футболу, туры беларускага чэмпіянату будуць праходзіць у выходныя, а тэлеканал «Лад» абяцае паказваць адзін з матчаў у жывым этэры.
Каб усе так лаяліся
Расейскі футбольны саюз (РФС) можа накласьці штраф на паўабаронцу маскоўскага «Дынама» і найлепшага гульца зборнай Беларусі-2004 Максіма Рамашчанку. За дзесяць хвілін да заканчэньня матчу расейскай прэм’ер-лігі «Дынама» (Масква) — «Сатурн» (Раменскае) арбітар сустрэчы Сяргей Фурса выдаліў з поля беларуса, а таксама гульца «Сатурну» Валера Есіпава за тое, што нецэнзурна лаяліся адзін на аднаго.
Рамашчанка пасьля матчу моцна зьдзівіўся: «Калі за мат кожнага выганяць з поля, то да канца сустрэчы ніхто не дагуляе». Футбалістам, паводле дысцыплінарнага рэглямэнту РФС, пагражае штраф у 100 тыс. расейскіх рублёў і дыскваліфікацыя на чатыры гульні.
Мабільнік — найлепшы сябар трэнэра
Трэнэр лёнданскага футбольнага клюбу «Чэлсі» Жазэ Мурынью быў дыскваліфікаваны на два матчы Лігі чэмпіёнаў — сустрэчы адной чацьвертай фіналу між «Чэлсі» і «Баварыяй» (6 і 12 красавіка). Першы матч, што прайшоў на мінулым тыдні, партугальскі спэцыяліст сумленна адседзеў у падтрыбунным памяшканьні. Але нямецкія журналісты — а «Баварыя» саступіла зь лікам 2:4 — падазраюць, што ня ўсё было чыста. Так, журналісты «Bild» кажуць, што трэнэр галкіпэраў лёнданскага клюбу Сільвіну Лоўру падчас другога тайму тройчы адыходзіў у падтрыбунныя памяшканьні, і пасьля кожнага зь ягоных вяртаньняў «Чэлсі» праводзіў замены. А трэнэр лёнданцаў па фізпадрыхтоўцы Руй Фарыя правёў увесь матч, нягледзячы на вельмі цёплае надвор’е, у шапцы. Журналісты намякаюць на тое, што ў партугальца на галаве было схаванае нейкае прыстасаваньне для сувязі з галоўным трэнэрам. Для Мурынью гэта не ўпершыню. Два гады таму, калі ён быў трэнэрам «Порту», падчас паўфіналь-нага матчу Кубку УЭФА з рымскім «Лацыё» на яго таксама была накладзена дыскваліфікацыя. Але Мурынью паслаў на лаву трэнэраў больш за трыццаць эсэмэсак. «Порту» тады пасьпяхова прайшла паўфінал і ўрэшце выйграла Кубак УЭФА.
Кепкетэр сыдзе праз год
Знакаміты дацкі чарнаскуры бягун Уілсан Кепкетэр заявіў пра тое, што завершыць сваю спартовую кар’еру пасьля чэмпіянату Эўропы-2006, што мае прайсьці ў швэдзкім Гётэборгу. «У 1995 я выйграў у Гётэборгу першы тытул, там я маю намер і завяршыць выступленьні».
Уілсан нарадзіўся ў 1973 г. у Кеніі, але колькі год таму прыняў грамадзянства Даніі. «Кіпкетэр шмат даў як лёгкай атлетыцы наагул, так і дацкаму спорту ў прыватнасьці. Яго будзе не хапаць на лёгкаатлетычных пляцоўках сьвету», — з сумам зазначыў прадстаўнік Фэдэрацыі лёгкай атлетыкі Даніі.
АР
