Няма на іх Бога
У ноч на Радаўніцу ў Воршы была абрабавана царква Раства Хрыстовага ля чыгуначнага вакзалу. Зладзеі скралі грошы, крыжыкі ды іншае. Каштоўных абразоў ды багатага начыньня храм ня мае, бо напрыканцы 1990-х г. пад яго быў пераабсталяваны звычайны чыгуначны вагон. Дарэчы, зладзеі дзейнічалі досыць нахабна, бо якраз насупраць месьціцца аршанскі аддзел унутраных спраў на транспарце. А магчыма, хтосьці зь іх асабіста ведае або ў будучыні пазнаёміцца з настаяцелем храма айцом Аляксандрам (Харламавым), які ў Віцебскай япархіі апякуецца папраўча-працоўнымі калёніямі.
А вось служкі касьцёлу Сьвятога Язэпа церпяць гэтай вясной ад бамжоў ды алькаголікаў. Тыя крадуць гатунковыя тульпаны, якія растуць у двары храму, ды нясуць іх прадаваць на гарадзкі рынак. Летась ля касьцёлу праводзілі цеплатрасу, таму плот разабралі і пакуль не аднавілі.
Яўген Жарнасек, Ворша
Сяднёў на сцэне
На IX Віцебскім гарадзкім фэстывалі школьных тэатраў першае месца журы на чале з мастацкім кіраўніком Драматычнага тэатру імя Якуба Коласа Віталем Баркоўскім прысудзіла спэктаклю «Сустрэча зь мёртвым» паводле драматычнай паэмы Масея Сяднёва. Спэктакль паставіў вучань 11-й клясы наваполацкай школы №12 Сяргей Лысоў у школьным тэатры «Анёл». Гэта дэбют Сяргея як рэжысэра, які займаецца ў студыі полацкай філіі тэатру імя Якуба Коласа.
Васіль Кроква, Полацак
