У адпаведнасці з пастановай Саўміна №16, якая апублікавана на нацыянальным прававым партале, на падпісанне пратакола ўпаўнаважаны віцэ-прэм'ер Юрый Назараў, які курыруе паліўна-энергетычны комплекс.

Сутнасць змяненняў у дакуменце не раскрываецца. Пастанова прынятая на падставе ўказа Аляксандра Лукашэнкі, падпісанага 18 студзеня 2021 года.

Беларуска-расійскае міжурадавае пагадненне «аб мерах па ўрэгуляванні гандлёва-эканамічнага супрацоўніцтва ў галіне экспарту нафты і нафтапрадуктаў» падпісана 12 студзеня 2007 года. У пагадненні вызначаны індыкатыўныя балансы гандлю нафтай і нафтапрадуктамі паміж Беларуссю і Расіяй.

Папярэдні раз пагадненне змянялася 10 кастрычніка 2018 года, калі быў падпісаны міжнародны пратакол.

У прыватнасці, было вызначана, што ў 2017-2024 гадах аб'ём бяспошліннай пастаўкі нафты з РФ у Беларусь складае ад 17 млн тон да 24 млн тон у год.

Раней таксама паведамлялася, што ў пратаколе была замацаваная пастанова ўрада Расіі аб фактычнай забароне на пастаўкі ў Беларусь цёмных нафтапрадуктаў (аўтамабільны бензін, дызельнае паліва, мазут). Таксама была ўведзена забарона на пастаўкі звадкаванага вуглевадароднага газу.

Расійскі бок ініцыяваў забарону на бяспошлінныя пастаўкі ў Беларусь асноўных нафтапрадуктаў у сувязі са стратамі бюджэту. Тагачасны міністр энергетыкі Аляксандр Новак ацэньваў гэтыя страты ў 12 млрд рублёў у год. Пры гэтым адзначалася, што паводле вынікаў 2017 года продажу расійскіх нафтапрадуктаў у Беларусь выраслі ўдвая ў параўнанні з 2016 годам - да 3,25 млн тон.

Каментар пра сутнасць прапанаваных беларускім бокам змяненняў у міжурадавае пагадненне ў прэс-службах урада і канцэрна «Белнафтахім» атрымаць пакуль не ўдалося.