Фота Віктара Ведзеня
Урачыстасці ў Нацыянальным санктуарыі ў гонар апякункі Беларусі пройдуць у пятніцу 2 ліпеня і ў суботу 3 ліпеня.
Урачыстасці сёлета пройдуць у традыцыйным фармаце, але з захаваннем належных санітарных прадпісанняў і без арганізаваных пілігрымак. Тым не менш, усе ахвотныя могуць ладзіць пілігрымкі ў індывідуальным парадку. Так было ўжо ў мінулым годзе, калі ўпершыню ў новай гісторыі Будслаўскага фэсту з-за складанай эпідэміялагічнай сітуацыі у Нацыянальны санктуарый не ішлі вялікія арганізаваныя групы пілігрымаў.
Пра тое, якім чынам лепш пілігрымаваць да Маці Божай у час пандэміі, Catholic.by запытаўся ў дасведчанага пілігрыма і арганізатара многіх пілігрымак у Будслаў — пробашча будслаўскай парафіі Унебаўзяцця Найсвяцейшай Панны Марыі ксяндза Дзмітрыя Дубовіка.
«Вядома, праблема не ў тым, каб ісці ў Будслаў у пешай пілігрымцы ці ехаць на ровары. У цяперашняй сітуацыі галоўнай цяжкасцю з’яўляецца арганізацыя супольнага харчавання і начлегаў падчас пілігрымак з вялікай колькасцю ўдзельнікаў.
Каб выключыць ці, прынамсі, звесці да мінімуму рызыку заражэння, пілігрымы могуць ісці ў Будслаў па адным, сем’ямі ці невялікімі групамі. Харчавацца ім давядзецца індывідуальна, а начаваць — у намётах, як падчас турыстычнай вандроўкі. Тое самае датычыцца пілігрымак на роварах.
Напэўна, у гэтым пілігрымкавым сезоне трэндам зноў стануць індывідуальныя пілігрымкі паасобку ці ў складзе малых груп, а таксама аднадзённыя пілігрымкі, накшталт той, якую штогод арганізуюць сямейныя рухі з вёскі Пузыры.Акрамя таго, заўсёды актуальнай застаецца магчымасць трапіць на фэст у Нацыянальны санктуарый на транспарце», — падаў ксёндз Дзмітрый Дубовік ідэі, якімі могуць скарыстацца тыя, хто пажадае сёлета трапіць на фэст у Будслаў.
