— Сабралі і сказалі, што нас «Санта» выкупіла. Мы хадзілі на працу, як звычайна, бо нам казалі, маўляў, «мы не ведаем, калі закрыемся». 5 красавіка мы выйшлі на працу, як у звычайны працоўны дзень — і нам сказалі, што сёння працуем апошні працоўны дзень, з заўтрашняга дня закрываемся, — патлумачыла Марыя. — Але нас так і не разлічылі. Ужо трэці дзень чакаем зарплаты за сакавік. У канцы месяца атрымалі толькі аванс.
— Гандлёвы дом «Вясёлка» закрыўся, а нас пра гэта не папярэдзілі загадзя — распавёў абвальшчык Міхаіл, які цяпер знаходзіцца з калегамі ў краме на Брэсцкай. — Нас проста 5-га паставілі перад фактам, што 6 красавіка — апошні працоўны дзень. Сказалі звальняцца па ўласным жаданні з пераводам у «Санту». «Санта» гатова ўзяць да сябе ўсіх работнікаў. Людзі спыталі:
«А што нам рабіць два месяцы, пакуль будзе пераабсталёўвацца наша крама на Брэсцкай?» Ім прапанавалі сыходзіць за свой кошт. А ў многіх крэдыты.
16 красавіка работнікаў запрасілі на сустрэчу ў закрытую краму:
— Сказалі сёння да 9.00 прыйсці. Мы прыйшлі — сказалі пісаць заявы па ўласным жаданні. Мы адмовіліся, — кажа Марыя.
Работнікі «Вясёлкі» вырашылі не разыходзіцца — і да гэтага часу ўжо каля чатырох гадзін застаюцца ў памяшканні крамы.
— Людзі хочуць звольніцца з кампенсацыяй — у памеры трох сярэдніх заробкаў. Не з пераразлікам нявыкарыстанага адпачынку, як нам кажуць, а з кампенсацыяй. Але нам адміністрацыя прапанавала звольніцца толькі па пагадненні бакоў, — патлумачыў Міхаіл.
Работнікі склалі калектыўны зварот у інспекцыю аховы працы.
«Нам 14 красавіка не была выплачана зарплата, а таксама несвоечасова выплачвалася зарплата ў папярэднія месяцы. Таксама мы не былі апавешчаныя аб тым, што крама «Вясёлка» па адрасе Пінск, вуліца Берасцейская, 37 закрываецца і мы застаёмся ўсім калектывам на вуліцы», — напісалі яны ў сваім лісце з патрабаваннем правесці праверку.
Да работнікаў сёння ўжо прыязджалі работнікі Пінскага гарвыканкама і прадстаўнік «Санта-рытэйл».
— Мы патлумачылі прадстаўніку «Санты», што да рытэйлера ў нас няма ніякіх пытанняў. Усе рады перайсці да іх працаваць. Пытанні засталіся да «Вясёлкі, — кажа Міхаіл.
Раней «Вясёлка» паведамляла пра тое, што да 20 красавіка закрые 12 сваіх гандлёвых аб'ектаў у Салігорску, Слуцку і іншых гарадах Беларусі. На іх месца прыйдуць «Санта рытэйл» і «Еўраопт».
