Фота pixabay.com.
Згодна з новай працай дыетолагаў Бірмінгемскага ўніверсітэта, дзеці атрымліваюць больш цукру праз харчаванне дома, чым у школе ці праз перакусы. Пры гэтым шматкі хуткага гатавання, паўфабрыкаты і дэсерты садзейнічаюць развіццю атлусцення і карыесу больш, чым цукеркі.
У сваёй працы навукоўцы прааналізавалі харчаванне 813 вучняў ва ўзросце ад 11 да 15 гадоў з 12 школ у англійскім графстве Уэст-Мідлэндс. Атрымалася высветліць, што сярэдняе ўжыванне цукру падчас сняданка было вышэйшым, чым падчас усіх астатніх прыёмаў ежы, і складала 8,8 грамаў, піша Daily Mail.
Навукоўцы таксама вылічылі колькасць шкодных свабодных цукраў у рацыёне дзяцей — гэта любы цукар, які дадаецца да ежы ці напою альбо існуе ад прыроды ў мёдзе, сіропе і фруктовым соку. Сярэдняя колькасць такіх цукраў у даследаваных рацыёнах склала 57,2 грама, пры гэтым большую частку з іх дзеці атрымлівалі па-за межамі школы.
Дыетолагі робяць выснову, што бацькам варта перагледзець падыход да хатняга рацыёну, каб абараніць здароўе дзяцей. Напрыклад, можна адмовіцца ад штодзённага спажывання дэсертаў, замяніць газіроўку на ваду і звяртаць больш увагі на колькасць цукру ў соусах.
