Дыпламаты спыталі аб планах беларускіх уладаў у дачыненні да выканання патрабаванняў Канстытуцыі краіны і міжнародных абавязацельстваў, якія тычацца фундаментальных правоў і свабод, а таксама вяршэнства права.
Дыпламаты заклікалі ўлады адгукнуцца на патрабаванні беларускага народа:
— неадкладна спыніць пераслед усіх асоб, якія ўдзельнічаюць у дэмакратычным руху, а таксама незалежных СМІ і грамадзянскай супольнасці; прадэманстраваць павагу свабоды перакананняў, выказвання і сходаў;
— неадкладна спыніць адвольныя затрыманні, катаванні і бесчалавечнае абыходжанне ў дачыненні да мірных пратэстоўцаў і палітычных зняволеных;
— неадкладна вызваліць і рэабілітаваць усіх палітвязняў і несправядліва затрыманых;
— без прамаруджання расследаваць парушэнні правоў чалавека і прыцягнуць да суду тых, хто санкцыянаваў і здзяйсняў акты гвалту, катаванняў, бесчалавечнага абыходжання і незаконныя дзеянні, якія прывялі да цялесных пашкоджанняў, траўмаў, гібелі людзей, а таксама да фарміравання агульнай атмасферы беззаконня ў краіне;
— пачаць годны даверу і інклюзіўны палітычны працэс, вядучы да свабодных і справядлівых выбараў пад наглядам БДІПЧ АБСЕ.
Дыпламаты таксама праінфармавалі міністра аб патэнцыяле пазітыўнага развіцця адпаведных двухбаковых адносін у тым выпадку, калі ўлады Беларусі распачнуць адчувальныя і значныя крокі па забеспячэнні захавання дэмакратычных нормаў у краіне.
Кіраўнікі місій заклікалі ўлады краіны знаходжання ўстрымлівацца ад дзеянняў, якія перашкаджаюць дыпламатычнай супольнасці ў Беларусі ў выкананні іх звычайных дыпламатычных абавязкаў у атмасферы, свабоднай ад умяшання і запалохвання.
Кіраўнікі місій таксама выказалі чаканне, што беларускі бок дазволіць калегам з Літвы, Польшчы, Латвіі, Вялікабрытаніі і ЗША, якіх папрасілі пакінуць краіну, вярнуцца ў Беларусь.
Дыпламаты пацвердзілі, што іх урады па-ранейшаму гатовыя аказваць падтрымку і спрыяць інклюзіўнаму нацыянальнаму дыялогу ў Беларусі з мэтай дапамагчы абараніць суверэнітэт і незалежнасць Беларусі, а таксама гарантаваць яе бяспечную, дэмакратычную і квітнеючую будучыню.
На думку трансатлантычнай супольнасці нацый, краевугольным каменем суверэнітэту з'яўляюцца згода (а не падпарадкаванне) грамадзян, сацыяльная салідарнасць і бяспека, дынамічныя інстытуты і свабодная прэса.
