Цана на расійскі газ, які пастаўляецца ў Беларусь, у 2021 годзе не павінна перавысіць паказчыкі бягучага года. Пра гэта заявіў у панядзелак старшыня калегіі Еўразійскай эканамічнай камісіі (ЕЭК) Міхаіл Мясніковіч у эфіры тэлеканала «Беларусь-1».
«Ёсць інструменты, якія дазваляюць збліжаць пазіцыі, каб цэны былі роўнадаходнымі, асабліва што тычыцца тарыфу на прапампоўку газу, то-бок па тэрыторыі Расійскай Федэрацыі, пакуль газ дойдзе да Беларусі», — дадаў кіраўнік ЕЭК.
Цана расійскага газу ў 2020 годзе для Беларусі складае $127 за 1 тыс. кубаметраў.
70% цаны — гэта выдаткі на транзіт. Тарыфы на пастаўку газу па тэрыторыі РФ у тры разы меншыя, чым пры пастаўцы ў Беларусь.
Лукашэнка заклікаў Расію зрабіць цану «больш адаптыўнай», але Пуцін падкрэсліваў, што адзіны тарыф можа быць «толькі на адзіным рынку з адзіным бюджэтам і сістэмай падаткаабкладання».
