Улады Фінляндыі з-за пагаршэння сітуацыі з каранавірусам увядуць у краіне трохтыднёвы лакдаўн — з 8 да 28 сакавіка. Аб гэтым паведамляе інфармацыйны партал Yle.
Згодна з рашэннем урада, у гэты час навучэнцы сярэдніх і старэйшых класаў будуць пераведзены на дыстанцыйны фармат навучання. У краіне будуць прыпыненыя групавыя заняткі для асоб, старэйшых за 12 гадоў. На дзяцей да гэтага ўзросту абмежаванні не распаўсюджваюцца.
Урад унясе ў парламент прапанову аб закрыцці прадпрыемстваў грамадскага харчавання ў большасці рэгіёнаў. Яны змогуць працаваць на дастаўку. Рэстараннаму бізнэсу будзе аказана фінансавая дапамога, паабяцала прэм'ер Сана Марын.
Акрамя гэтага, у рэгіёнах з неспрыяльнай эпідэміялагічнай сітуацыяй ўлады рэкамендавалі забараніць правядзенне мерапрыемстваў з колькасцю ўдзельнікаў, большай за шэсць чалавек.
Каменданцкай гадзіны ў краіне не будзе. Рашэнне аб магчымым пераносе муніцыпальных выбараў не прынята.
У Фінляндыі за ўвесь час зафіксавана 55 687 выпадкаў каранавіруса, але за ўчора рост склаў 565. Памерлі за ўвесь час 740 чалавек.
