1. Бельгія
Гулец «Чэлсі» Эдэн Азар — зорка №1 Бельгіі
Мабыць, заўзятары са стажам добра памятаюць гульню чэмпіянату свету па футболе 1986 года. Тады ў мексіканскім Леоне ў 1/8 фіналу Бельгія ў звышдраматычнай гульні перамагла СССР — 4:3. За тую савецкую каманду гуляў наш Сяргей Алейнікаў. Тады Бельгія ў выніку спынілася на чацвёртым радку.
Кажуць, што сённяшняе пакаленне маладых бельгійцаў — самае таленавітае ў гісторыі каманды. Паглядзіце склад бельгійцаў — адны зоркі найлепшых чэмпіянатаў.
Канечне, камандзе бракуе досведу, але нават галоўны трэнер нашай зборнай Георгій Кандрацьеў сказаў, што не здзівіцца, калі бельгійцы выйдуць у фінал.
Глядзі таксама: Футбол і фавэлы: сёння стартуе Чэмпіянат свету па футболе
2. Боснія
Эдзін Джэка - галоўная надзея зборнай Босніі
Некалькі разоў гэтая невялікая балканская каманда была за некалькі крокаў да выхада на топ-спаборніцтвы, але ў апошні момант ім дарогу пераходзілі падступныя партугальцы. Летась, нарэшце, прарвала: Боснія па праву паехала ў Бразілію.
На чэмпіянат не прабіліся ні палякі, ні ўкраінцы, ні чэхі, ні славакі.
Можа, у такіх варунках нехта з беларусаў і пачне сімпатызаваць крэпкай камандзе Сафета Сушыча. Плюс да ўсяго — яшчэ зусім нядаўна краіна ляжала ў руінах пасля вайны.
3. Кот-д’Івуар
Дзідзье Драгба — №1 у Кот-д'Івуары
Ад афрыканскага футбола заўсёды чакаеш нейкага прарыву. Здаецца, што вось-вось афрыканцы пачнуць на роўных гуляць з еўрапейцамі і лацінаамерыканцамі. Чатыры гады таму толькі цуд не дазволіў ганцам прайсці ў паўфінал мундыялю.
Сёлета чаканні ад афрыканцаў такія ж завышаныя. Здаецца, зборная Кот-д’Івуара вядучая, хай і з пастарэлым, але ўсё такім жа непараўнальным Дзідзье Драгба, найбольш здольная рашаць сур’ёзныя турнірныя задачы.
4. Чылі
Паўабаронца «Ювентуса» і зборнай Чылі Артура Відаль
Вы заб’яце нам — сколькі зможаце, мы заб’ём вам — колькі захочам. Выглядае, што бразільцы пачынаюць забываць гэтую імі ж і створаную ісціну. Затое такі лозунг на ўзбраенне ўзяла зборная Чылі.
Іхні трэнер Хорхе Сампаолі скалаціў самую бесшабашную каманду свету на сённяшні дзень. Галоў у матчах чылійцаў павінна быць шмат.
5. Японія
Сіндзі Кагава пагуляў у «Барусіі», цяпер гуляе ў МанЮнайтэд.
Сіндзі Кагаву і Кейсуке Хонду ведаюць усе футбольныя заўзятары. Гэтыя «самураі» (так называюць японскую зборную) прабіліся ў моцныя клубы — «Манчэстэр Юнайтэд» і «Мілан».
Хай і не заўсёды гуляюць за свае каманды. Японцы вытрыманыя, дысцыплінаваныя, атлетычныя. Падаецца, яны здольныя на многае.
