Цела 26-гадовага турыста з Беларусі знайшлі днём 29 лютага ў возеры ля падножжа вадаспаду ў раёне горада Далат у В'етнаме. Няшчасны выпадак адбыўся ў нядзелю, паведамляюць мясцовыя СМІ.
У пасольстве Беларусі ў В'етнаме пацвердзілі, што цела беларуса было знойдзена ў панядзелак, 29 лютага.
Выратавальная аперацыя, thanhniennews.com
Ратавальнікі дасталі цела Віктара Бандарэнкі з возера ля падножжа вадаспаду Пангур у 10.30 раніцы. Яно будзе дастаўлена ў морг ў Хашыміне, затым будзе вырашацца пытанне аб дастаўцы цела ў Беларусь.
У пошуках удзельнічалі амаль 100 ратавальнікаў.
Папярэдне ўстаноўлена, што малады чалавек, распрануўшыся, скокнуў у возера ля падножжа вадаспаду Пангур (каля 40—50 км ад горада) прыкладна а трэцяй гадзіне дня.
Турысты, што знаходзіліся побач, адзначылі, што амаль адразу ён пачаў тануць. Яны спрабавалі аказаць тануламу дапамогу, але не змаглі і паведамілі пра здарэнне мясцовым уладам.
Ратавальнікі працягвалі пошукі да дзевяці вечара, пакуль вада ў возеры не стала халоднай. На наступную раніцу пошукі аднавіліся.
Паводле інфармацыі мясцовых СМІ, Віктар Бандарэнка прыехаў у В'етнам 16 лютага.
Некалькімі днямі раней у вадаспадах у той жа мясцовасці загінулі трое брытанцаў: 25-гадовы хлопец і дзяўчаты 19 і 25 гадоў. Турысты спускаліся ўніз па вадаспадзе без страхоўкі, паслізнуліся і разбіліся, зваліўшыся на камяні.
