dumskaya.net
Сёння раніцай чыноўнікі адэскай мэрыі не змаглі трапіць на свае працоўныя месцы: пратэстоўцы на Думскай плошчы заблакавалі шынамі ўсе тры ўваходы ў будынак, паведамляе гарадскі сайт dumskaya.net.
Як адзначаюць актывісты, такія дзеянні — помста за начны разгром намётавага гарадка.
Галоўны ўваход у будынак забарыкадавалі смеццевымі бакамі, шынамі і плотам.
dumskaya.net
Па словах удзельнікаў акцыі пратэсту, сёння ноччу група мужчын пад'ехала на аўтобусе да месца бестэрміновага пікету і пачала збіваць дэманстрантаў. Некалькіх нападнікаў удалося затрымаць.
dumskaya.net
Дэманстранты сцвярджаюць, што разблакуюць будынак гарадской адміністрацыі толькі пасля адстаўкі мэра.
Акцыі пратэсту ля будынка адміністрацыі Адэсы (Украіна) з патрабаваннем звальнення мэра горада Генадзя Труханава пачалася 10 красавіка. Нагодай для бестэрміновага пікету сталі дадзеныя расследавання тэлеканала 24 на аснове «Панамскага архіва».
З расследавання вынікае, што ў Труханава і яго атачэння ёсць больш за 20 афшорных фірмаў на Брытанскіх Віргінскіх астравах, прычым у якасці грамадзянства пры іх рэгістрацыі адэскі мэр падаў расійскае.
