Xinhua/Barcroft Images
Улады Італіі прыцягнуць кітайскіх паліцыянтаў для патрулявання вуліц у Рыме і Мілане. Пра гэта паведаміў міністр унутраных спраў краіны Анджэліна Анфаро, перадае The Guardian. Паводле яго слоў, патрулі, якія складаюцца з суайчыннікаў, дапамогуць кітайскім турыстам адчуваць сябе ў бяспецы.
«Эксперымент распрацоўваўся для зручнасці турыстаў з Кітая. Калі ён будзе паспяховы, то мы абдумаем новыя формы супрацоўніцтва, улічваючы наяўнасць кітайскай абшчыны ў нашай краіне», — заявіў Анфаро.
Паліцыянты, якія прайшлі навучанне пад кіраўніцтвам італьянскіх спецыялістаў у Пекіне, будуць насіць форму, прынятую ў Кітаі, каб грамадзяне КНР маглі іх пазнаваць. Патрулі будуць перадаваць інфармацыю італьянскім праваахоўнікам і дапамагаць суайчыннікам кантактаваць з мясцовымі ўладамі пры неабходнасці.
У самім Кітаі да замежных турыстаў ставяцца з асцярогай. Кітайцы стварылі комікс, сюжэт якога накіраваны на перасцярогу грамадзянак краіны, якія працуюць на дзяржаўных пасадах, ад рамантычных адносін з замежнікамі, у прыватнасці турыстамі.
Па сюжэце іншаземец Дэвід завязвае адносіны з дзяржслужачай Сяо Лі. Турыст заляцаецца да дзяўчыны і робіць ёй дарагія падарункі. Праз некаторы час мужчына пачынае распытваць кітаянку аб працы і, падманам атрымаўшы сакрэтныя звесткі, звязаныя з палітычным курсам краіны, знікае. Пасля таго, як дзяўчына аддае каханку копіі дакументаў, яе арыштоўваюць за разгалошванне дзяржаўных і ваенных таямніц. У рэальным жыцці за падобнае злачынства можа пагражаць пазбаўленне волі на тэрмін ад пяці гадоў да пажыццёвага.
