Камісія спартсменаў пры Алімпійскім камітэце Расіі звярнулася з адкрытым лістом да прэзідэнта Міжнароднага алімпійскага камітэта (МАК) Томаса Баха ад імя спартоўцаў, не замяшаных ва ўжыванні допінгу.
Аўтары ліста просяць кіраўніка МАК дазволіць спартсменам,якія не ўжывалі допінг, удзельнічаць у Алімпіядзе ў Рыа-дэ-Жайнейра.
«Права любога атлета, які ніколі не парушаў ніякіх існуючых правілаў, выступаць на Алімпійскіх гульнях, — непарушна. І мы ад усяго сэрца просім Вашай падтрымкі ў захаванні гэтага права», — гаворыцца ў звароце.
Члены расійскай алімпійскай зборнай па лёгкай атлетыцы, падкрэсліваецца ў лісце, не маюць дачынення да допінгавага скандалу.
«Расійскія лёгкаатлеты, якія прэтэндуюць на ўдзел у Гульнях у Рыа праходзяць як мінімум тры дадатковыя незалежныя антыдопінгавыя тэсты, каманда знаходзіцца пад пастаянным кантролем з боку міжнародных антыдопінгавых інстанцый, да алімпійскага адбору не дапушчаны ўсе, хто калі-небудзь меў допінгавую гісторыю», — гаворыцца ў звароце.