Насупраць будынку Эўрапейскай камісіі й Парлямэнцкай Асамблеі дзеячы беларуска-эўрапейскага задзіночаньня Бэльгіі правялі пікет. Старшыня задзіночаньня Зьміцер Піменаў кажа, што ўдзельнікі пратэставалі супраць спробаў асобных эўрапейскіх палітыкаў пачаць дыялёг з Аляксандрам Лукашэнкам і яго асяродзьдзем.
З. Піменаў: Гэты пратэст выкліканы візытам эўрапейскага палітыка да дыктатара. Мы лічым, што гэта чарговая спроба ўбіць клін у супольную пазыцыю Эўразьвязу й дэмакратычнай эўрапейскай супольнасьці, якія выконваюць сваю гістарычную місію й дапамагаюць у станаўленьні Беларусі як дэмакратычнай незалежнай дзяржавы. Мы лічым, што размовы са злачынцамі немагчымыя бяз поўнага іх раскаяньня ў зьдзейсьненых злачынствах.
Удзельнікі пікету раздавалі ўлёткі зь інфармацыяй пра актуальную сытуацыю ў Беларусі. Варта дадаць, што беларуска-эўрапейскае задзіночаньне Бэльгіі дзейнічае ў горадзе Антвэрпан і аб’ядноўвае палітычных уцекачоў.