Сёння раніцай памёр народны мастак Беларусі Май Данцыг. Пра гэта ў сябе ў Facebook паведаміў яго калега Ігар Бархаткоў.
Маю Данцыгу было 86 гадоў.
- Гэта адна з найярчэйшых асобаў у беларускім мастацтве апошніх пяцідзесяці гадоў. Прафесійная супольнасьць ужо даўно прызнала яго класікам. Тое, што ён рабіў, тое, што рабіла гэта пакаленне, ужо ніколі не паўторыцца ні ў сваёй якасці, ні ў сваёй колькасці. Яго творчасць назаўсёды застанецца ў гісторыі нашай нацыі, - сказаў Tut.by старшыня Беларускага саюза мастакоў Рыгор Сітніца.
Мая Данцыга называлі мэтрам так званага «суровага стылю». Гэты кірунак у рэалістычным савецкім жывапісе 1960-х гадоў.
Акрамя гэтага, ён напісаў партрэты Васіля Быкава, Алеся Адамовіча, Анатоля Анікейчыка і іншых вядомых беларусаў.
Яго працы захоўваюцца ў фондах Нацыянальнага мастацкага музея Беларусі, Дзяржаўнай Траццякоўскай галерэі ў Маскве, у Музеі ВАВ у Мінску, музейных калекцыях Расіі, Галандыі, Германіі, Бельгіі, Італіі, ЗША і іншых краін.
Мастак нарадзіўся 27 красавіка 1930 года ў Мінску. Ён да апошняга выкладаў у Акадэміі мастацтваў. У 2005 годзе Май Данцыг атрымаў ордэн Францыска Скарыны.
Як мяркуецца, развітанне з народным мастаком Беларусі пройдзе ў аўторак, 28 сакавіка.
Цяпер чытаюць
У будынку ГУБАЗіКа ў цэнтры Мінска адкрыюць малую сцэну тэатра Янкі Купалы10
Каментары