Impreza z doŭhaj nazvaj «Ciomaje pieršynstvo krainy siarod klubnych kamandaŭ i kamandaŭ kalektyvaŭ» adbyłasia, pa tradycyi, u nacyjanalnym Pałacy šachmat i šašak.
U paraŭnańni ź minułym hodam udzielnikaŭ pamienieła: ci to sioleta čas byŭ vybrany niaŭdała (6—10 traŭnia, razhar śviataŭ), ci to ŭznosy akazalisia zavialikimi (amal 500 tys. rubloŭ dla kamandy), ci to spracavała niežadańnie funkcyjaneraŭ Biełaruskaj federacyi šachmat reklamavać svaje karysnyja inicyjatyvy. Lepšaha pakidała žadać nia tolki aśviatleńnie turniru ŭ ŚMI, ale i staŭleńnie da hledačoŭ. Tyja, chto pryjšoŭ na aficyjnaje zakryćcio da zaplanavanaha času — čatyroch hadzinaŭ dnia, — byli pryjemna ahałomšany paviedamleńniem vachtarki: «A šachmatysty ŭžo raźbiehlisia».
Tak ci inačaj, tuzin klubaŭ ź Bieraścia, Viciebsku, Horadni, Miensku, Pinsku prademanstravali svaju moc urbi et orbi. Praktyčna ŭsie hulcy — i pieršarazradniki, i mižnarodnyja hrosmajstry — bilisia da apošniaj pieški.
Ad pačatku vyjaviłasia, što pretendavać na vychad u Eŭrapiejskuju lihu buduć letašnija lidery — «Viaśnianka» i «Vektar». Intryhi dadavaŭ chiba vystup kamandy Respublikanskaha centru alimpijskaj padrychtoŭki, kiraŭnikam jakoha ŭdałosia «pieramanić» ź «Viaśnianki» mižnarodnaha majstra Jurja Cichanava. Tym nia mienš, naśpiech sabranaj kamandzie RCAPu ciažka było kankuravać z zahartavanymi klubami. I «Viaśnianka», i «Vektar» tolki miž saboj zrabili ničyju, a ŭsie astatnija šeść matčaŭ vyjhrali, nabraŭšy pa 13 kamandnych punktaŭ. «Viaśnianka» zachavała čempijonski tytuł, «Vektar» zadavoliŭsia srebram. Nie dapamoh kamandzie biznesoŭca Piatra Hierasimoviča ni vyšejšy siaredni rejtynh EŁA, ni zaprašeńnie z Ukrainy hrosmajstra Spartaka Vysočyna (EŁA 2583). Darečy, lehijanery, hulajučy na pieršych doškach, prynieśli «Vektaru» nia duža mnoha bałaŭ. «Lepiej było dać padzarabić našym znakamitym «hrosam» abo majstram, — burčeli naziralniki, — a to vuń Fiodaraŭ, čempijon Biełarusi, hulaje ŭ rasiejskim čempijanacie za samarski klub «Juniłajn» na šostaj došcy».
Turnir staŭsia dobraj škołaj dla maładych kandydataŭ z 11-j mienskaj spartškoły, a taksama dla pradstaŭnic pryhožaha połu, choć ichnija kamandy (adpaviedna «Junactva» i «Nadzieja») i apynulisia ŭ chvaście tablicy.
Pad štandaram «Viaśnianki» vystupili braty Žyhałki, Ihar Lucko, Jaŭhien Mačałaŭ, Michaił Hinzburh, Uładź Kucankoŭ. Lider kamandy Andrej Žyhałka ź blaskam nabraŭ šeść bałaŭ u siami hulniach. Hierojem spabornictva treba ličyć taksama 64-hadovaha mižnarodnaha majstra Ŭładzimiera Litvinava. Jon vyznačyŭsia jašče na Ŭsiesajuznaj šachmatnaj spartakijadzie 1963 hodu, kali biełarusy zavajavali bronzavy medal. Sioleta sp.Litvinaŭ byŭ zapasnym, adnak, čatyry razy sieŭšy za došku, unios u ahulnuju skarbonku 3,5 bała.
