Michał Aniempadystaŭ pa prahladzie kijeŭskaha konkursu «Eŭrabačańnie»: «Hryndžoły» śpiavali dla majdanu, a nie da ŭsioj eŭrapiejskaj aŭdytoryi. Padolskaj nie stavała ščyraści, a Biełarusi — pačućcia miery».
«Naša Niva»: Jakija nazirańni Vy zrabili ź sioletniaha konkursu?
Michaił Aniempadystaŭ: Źmianiłasia vaha pamiž Paŭnočnaj i Paŭdniovaj Eŭropaj. Muzyčnyja husty Poŭdnia mocna ŭpłyvajuć na vyniki ahulnaeŭrapiejskaha hałasavańnia. Šmat jakija vykanaŭcy sprabavali paŭtaryć stylovyja znachodki minułahodniaj pieramožcy. Tamu ci nia kožny druhi vystupoŭca aktyŭna vykarystoŭvaŭ vialikija barabany.
«NN»: Ale čym začapiła pieśnia hračanki Paparyzu? Aryhinalnaj jaje nazvać składana…
MA: Mianie nie začapiła, ale jana maje charyzmu. Jak i łatyšy, naprykład. Choć jany pracavali ŭ inšaj estetycy — minimalistyčnaj.
«NN»: Pampeznaść — admoŭny bok?
MA: Kali Daniju pradstaŭlaje zvyčajny nastaŭnik muzyki, značyć, što ŭ hetaj krainie ŭsio ŭ paradku i z demakratyjaj, i z šoŭ-biznesam. Kali vystupoŭcu adpraŭlajuć na «Eŭrabačańnie» jak pieršaha kasmanaŭta — stanoŭčych emocyj heta nie vyklikaje.
“NN”: Što jašče treba dla stvareńnia stylnaha pop-praduktu? Letaś Biełaruś pastaviła na samabytnaść, sioleta namahałasia ŭsačyć za modaj. Abodva razy pravalilisia…
MA: Ja ź cikavaściu naziraju za krainami Bałtyi. Jany vystaŭlajuć ścipłyja numary, ale vyhladajuć cikava. Pačućcio stylu źviazana z pačućciom miery.
“NN”: Pa vynikach hałasavańnia našy susiedzi — Rasieja i Ŭkraina — apynulisia daloka za miežami dziasiatki.
MA: Ukrainskamu numaru brakavała prafesijanalizmu. “Hryndžoły” śpiavali dla majdanu, a nie da ŭsioj eŭrapiejskaj aŭdytoryi. Padolskaj nie stavała ščyraści. Nie mahu dać viery, što jana nahetulki aburana palitykaj ZŠA. Tym, chto pieśniu napisaŭ, vidać, taksama nia nadta baleła. Falš adčuli hledačy.
Hutaryŭ Siarhiej Budkin
