U kancy žniŭnia — pačatku vieraśnia 2004 hodu Pracoŭnaja hrupa praviała adkrytaje ankietavańnie pa najbolš kontraversijnych pytańniach — šlacham adrasnaha rassyłańnia, a taksama praz hazetu «NN» (№32 za 27 žniŭnia) dy internet-sajt www.pravapis.org; vyniki ankietavańnia byli ŭličanyja ŭ prajekcie Zboru, jaki sioleta ŭ siaredzinie studzienia Pracoŭnaja hrupa razasłała 27-mi adrasatam (movaznaŭcam, litarataram, u zacikaŭlenyja instytucyi) na vodhuk. Apošni etap — uniasieńnie karektyvaŭ i zaćvierdžańnie kančatkovaje redakcyi — skončyŭsia na pačatku sakavika hetaha hodu.
Asnoŭnymi pryncypami dziejnaści Pracoŭnaje hrupy byli:
1) zachavać tradycyju («staryny nia rušyć, naviny nia ŭvodzić») i pa mahčymaści skasavać raźbiežnaści dy ŭnutranyja supiarečnaści ŭ sučasnaj praktycy «taraškievicy»;
2) spraścić toje, što paddajecca spraščeńniu, kab klasyčny pravapis byŭ bolš kankurentazdolny j vymušaŭ da zruchaŭ aficyjny pravapis;
3) palehčyć budučaje zbližeńnie pravapisaŭ.
U ciapierašnim Zbory Pracoŭnaja hrupa zbolšaha zachavała źmiest raźviazańniaŭ, prapanavanych u prajekcie V.Viačorki, ale istotna pierapracavała farmuloŭki artahramaŭ, abjom i raźmierkavańnie materyjału pa raździełach, ilustracyjny materyjał, a taksama dapoŭniła dakument šeraham novych raździełaŭ i artahramaŭ. Niekatoryja artahramy sfarmulavanyja ŭpieršyniu, adnak jany nia ŭvodziać novych pryncypaŭ, a ekstrapalujuć užo isnyja na materyjał, dahetul nie apisany (a počastu — i nieŭnarmavany) z artahrafičnaha hledzišča.
Pravapis čytajcie ŭ papiarovaj i pdf-versii hazety "Naša Niva"
