Nieviadomyja na radzimie muzyki vyjaždžajuć za miažu i biaruć pieršaje miesca na
mižnarodnym konkursie. Kali takoje robicca normaj, nastaje čas dla analizu.
Homielski hurt «Al Narrator Orchestra» ŭpeŭniena pieramoh u konkursie amatarskich kalektyvaŭ na festyvali «Noc bluesowa» ŭ polskaj Ravie-Mazavieckaj. Piša Źmicier Padbiareski.
Łuizijanski bluz na bierahach Saža
Festyval — adnahodak «Basovišča», adnak upieršyniu biełaruskich muzykaŭ zaprasili ŭ Ravu-Mazavieckuju piać hadoŭ tamu. Z taho času majem dva pieršyja miescy ŭ konkursie i try zaachvočvalnyja pryzy ad žury. Pazaletaś mienskaje tryjo «Big Val, Svet & Al» uraziła mižnarodnaje žury arhaničnym, stylovym vykanańniem karennaha bluzu. Sioleta hamialčanie z «Al Narrator Orchestra» pajšli jašče dalej, prezentavaŭšy prahramu, zasnavanuju na zajdeka — raznavidnaści delta-bluzu, radzimaj jakoj źjaŭlajecca štat Łuizijana.
U Biełarusi takuju muzyku vykonvaje tolki «Al Narrator Orchestra». A pakolki jon adziny, jaho viadomaść nie vychodzić pa-za miežy delty Saža.
Zajdeka — klasyčny viaskovy bluz, jaki spałučaje ŭłasna bluzavuju tradycyju i spradviečnuju muzyku kreołaŭ — pierasialencaŭ z Francyi na poŭdzień Złučanych Štataŭ. Pakolki adnym z typovych dla francuzaŭ instrumentaŭ byŭ akardeon, mienavita jon u muzycy zajdeka staić na pieršym planie, spałučajučysia ŭ hučańni sa słajd-hitaraj i hubnym harmonikam.
Chvalavalisia darma
«Al Narrator Orchestra», što składajecca z šaści čałaviek, utvaryŭsia minułaj vosieńniu ź inicyjatyvy «baćki» homielskaha bluzu, hitarysta, śpievaka i vykładčyka Alaksandra Cyhanka. Vystup u Ravie-Mazavieckaj byŭ usiaho druhim publičnym kancertam kalektyvu. Pa-za miežami hurtu jaho ŭdzielniki zachaplajucca inšaj muzykaj. Tak, Alaksandra Safonava viedajuć pad imiem Alaksandar Sofiks jak vykanaŭcu ńju-ejdžu, akardeanist Alaksandar Hułaj vystupaje ŭ składzie fankavaj kamandy. Adnak pad kiraŭnictvam Cyhanka jany hrajuć staražytnuju zajdeku, pryčym vyhladajuć na scenie na dziva ŭpeŭniena.
U repertuary hrupy nia tolki tvory klasykaŭ žanru. Jakija b tvory ni vykonvalisia, usie jany padajucca jak firmovaja homielskaja strava — tolki va ŭłasnych aranžyroŭkach. Padmurak hučańnia składajuć dyjalohi hubnoha harmonika i akardeona, hruntoŭna padmacavanyja hitaraj A.Cyhanka. Heta ŭražvała na fonie polskich hurtoŭ, jakija vykonvali standartny rok ź bluzavymi intanacyjami.
Hałasavańnie adbyvałasia demakratyčna. Spačatku siabry žury z Polščy, Słavaččyny, Biełarusi i Vuhorščyny nazvali tyja kalektyvy, jakija źviarnuli na siabie ŭvahu. Usie siarod inšych nazvali i hamialčan. Zatym pa bolšaści zhadak adabrali čatyry hrupy, i pa vynikach druhoho turu hałasavańnia vyjaviłasia, što «Al Narrator Orchestra» — pieramožca. Druhoj u konkursie stała polskaja hrupa «The Town» z aŭtarskimi polskamoŭnymi bluzami, treciaje miesca padzialili słavaki «Zalman Brothers Band» i «Blues Pill» z Vuhorščyny. Pry hetym «hubny harmonik» hamielčukoŭ Dźmitry Roba byŭ adznačany pryzam u vyhladzie dobraha mikrafona.
Tut by jakomu ź mienskich kancertnych ahienctvaŭ nieadkładna naładzić kancert hamialčan choć by ŭ jakim z klubaŭ. Ale vykanaŭcam bluzu ŭ Biełarusi, musić, nakanavana zastavacca pryhniečanaj muzyčnaj mienšaściu…
Brytancy na razahrevie
Pakolki festyval u Ravie-Mazavieckaj adbyvaŭsia ŭ piatnaccaty raz, arhanizatary parupilisia i pra šykoŭny fajerverk, i pra haściavuju častku prahramy. I tut pasłuchać było što!
Mienčukoŭ z «Madery hard bluz» «razahravała» lehienda suśvietnaha bluzu «Ten Years After»?! Skład anhličan byŭ amal aryhinalny: Čyk Čarčył na klavišnych, Łea Łajanz na basie, Ryk Li na barabanach. Ełvina Li zamianiaŭ 27-hadovy hitaryst i śpiavak Džo Huč, ale heta była z tych zamien, jakija kašy anijak nie psujuć. Enerhija, ź jakoj pracavali bluzavyja pensijanery, vartaja pierajmańnia.
Biełaruś biazbluzavaja
I što majem u vyniku? Spyniłasia tradycyja bluzavych festyvalaŭ u Miensku, na sustrečach u bluzavym «Star-klubie» adny j tyja ž vykanaŭcy, hurt «Mojo Blues», jaki vielmi šanujuć u Polščy, bolš čym paŭhodu pracuje na poŭnačy Kitaju, «Krama» pazbaŭlena mahčymaści davać kancerty na radzimie, niekali biełaruskaja hrupa «Seven B» zusim niabłaha pačuvajecca ŭ Polščy.
Niama bluzavych prarokaŭ na Ajčynie. A tamu adno sa spadziavańniaŭ — na Ravu-Mazaviecku. Jak zapeŭniŭ mianie burmistar horadu Jaŭhienijuš Huraj, haradzkija ŭłady prykładuć usie siły, kab biełaruskija muzyki zaŭsiody mieli mahčymaść pakazacca na «Nocy bluzovaj».
Aŭtar vykazvaje padziaku pamiežnikam ź pierachodu «Varšaŭski most» za prafesijanalizm pry vykanańni słužbovych abaviazkaŭ.
