Paśla denaminacyi ŭ Rumynii biełarusy zrobiacca adzinym narodam u Eŭropie, jaki raźličvajecca tysiačami za johurty i miljonami za meblevyja harnitury.
Adnačasova siaredni zarobak rumyna apiaredziŭ biełaruski.
1 lipienia biełaruski rubiel zrobicca samaj tannaj valutaj u Eŭropie. U piatnicu 1 lipienia rumynskaja leja pazbaŭlajecca ad čatyroch nuloŭ — spadčyny časoŭ šalonaj inflacyi. U aŭtorak la bankamataŭ pa ŭsioj krainie ŭtvarylisia vialikija čerhi. Ludzi žadali ŭziać dastatkova hatoŭki, kab dažyć da paniadziełka: z techničnych pryčyn, źviazanych z denaminacyjaj, banki prypynyli rabotu na piać dzion. Rumynija choć i kročyć da Eŭraźviazu, adnak jašče nia maje takoj vialikaj doli ludziej, što karystajucca kredytnymi kartkami, — tamu nasielnictva vyrašyła nazapasić najaŭnych.
Psycholahi kažuć, što advykańnie ad nuloŭ zojmie peŭny čas i moža pryvieści da taho, što ceny buduć zdavacca mienšymi, čym jany jość nasamreč, a aficyjantam u restaranach pačnuć bolš davać na čaj.
Rumyny, jakija majuć dośvied krucielskich denaminacyj za savieckim časam, krychu napužanyja, ale Nacyjanalny bank supakojvaje: mianiać hrošy možna budzie ŭ nieabmiežavanaj kolkaści i na praciahu nieabmiežavanaha času.
Urad krainy rašyŭsia na denaminacyju, bo inflacyja letaś źniziłasia da 9%.
Takim čynam, kali raniej za adzin dalar davodziłasia płacić prykładna 29 800 lejaŭ, paśla reformy kurs składzie 2 lei 98 baniaŭ za adzin «zialony». Siaredni zarobak da denaminacyi składaŭ 7,4 miljony lejaŭ — ci 248 dalaraŭ paśla vyličeńnia ŭsich padatkaŭ.
Takim čynam, siaredni zarobak u Rumynii apieradžaje biełaruski. Praz usie 1990-ja było inačaj: Rumynija pa siarednim zarobku adstavała ad Biełarusi. Siaredni zarobak u nas, pavodle źviestak Ministerstva statystyki i analizu, za travień skłaŭ 449 933 rubli — kala 209 dalaraŭ.
