28 červienia na lekcyi ŭ Varšaŭskim universytecie U.Cimaševič abviaściŭ pra toje, što budzie balatavacca ŭ prezydenty.
Jon pamianiaŭ raniej pryniataje rašeńnie nie iści na vybary «pad upłyvam prośbaŭ siabroŭ i vybarščykaŭ». Vybarčy štab Cimaševiča pavinna ŭznačalić Jalanta Kvaśnieŭskaja, žonka Alaksandra Kvaśnieŭskaha. Asnoŭnymi supiernikami Cimaševiča stanuć kandydat pravych — mer Varšavy Lech Kačyński i biespartyjny kandydat, viadomy chirurh Źbihnieŭ Raliha.
Hajnaŭka — paviatovy horad z 25-tysiačnym nasielnictvam la Biełavieskaj puščy. Tut žyvuć pieravažna biełarusy. I tut prapisany maršałak Sojmu Ŭładzimiež Cimaševič, hałoŭny pretendent na prezydenckich vybarach.
Karespandent «Hazety vyborčaj» naviedaŭ Hajnaŭku.
Dzie znajści ŭzornaha hajnaŭca? U bary «Ŭ Vałodzi». Jaho ŭładalnik sabraŭ tam ściahi, uznaharody, fatazdymki minułaj epochi. Nad uvachodam — biust Lenina. Niepadalok ad baru — ofis U.Cimaševiča i inšych deputataŭ Sajuzu lavicy demakratyčnaj (SŁD).
U bary sustrakaju Marcina Salipiŭku i Mirasłava Pałku. Marcinu 25—30 hod, jahony siabar — udvaja starejšy. Jadnajuć ich pohlady na karjeru Cimaševiča.
— Daspadoby ŭ im toje, što jon daloki ad usioj hetaj chieŭry, — havoryć maładziejšy. — Cimaševič chodzić tut pa vulicach, kramach, sustrakajecca ź ludźmi prosta tak, bieź nijakaj televizii.
— I što z taho? — rytaryčna pytajecca Puščaniec — tak adrekamendavaŭsia čałaviek, jakoha ja sustreŭ na prypynku aŭtobusaŭ. — Z taho, što Cimaševič prajedzie praz horad, tołku mała. Kali «svoj čałaviek» vyrastaje tak vysoka, jon pierastaje bačyć, jak i čym žyvuć ludzi.
U samym centry Hajnaŭki staić budynak mahistratu j starostva. Pierad upravaj — pomnika zubra. Kala pomnika ja sustrakaju Pani Kataličku. Jana nam upraŭlaje mazhi:
— My, kataliki, nie prahałasujem za Cimaševiča. Pravasłaŭnyja havorać, što heta ichny čałaviek. Moža, i ichny, ale dakładna nia naš. Horad padzieleny, — pierakonvaje Pani Katalička. — Kali da nas ksiondz prychodzić, u mianie na ŭsioj placoŭcy ŭžo pšykajuć: «o, ksiondz pryjšoŭ»...
Ale jakoje dačynieńnie da hetaha maje Cimaševič?
— A pramoje. — Domik sabie kupiŭ u puščy. A čamu biez aŭkcyjonu? Moža, niechta inšy taksama chacieŭ by kupić?
U starasty Hajnaŭki Ŭładzimieža Pietračuka (SŁD) svajo mierkavańnie:
— Ludzi ličać jaho svaim. Sustrakajuć jaho na bazary, u kramie. Jon zrabiŭ dla Hajnaŭki šmat. Filijał Biełastockaha politechničnaha instytutu, miascovaje samastojnaje kaznačejstva, nieŭzabavie adkryjecca pahranpierachod u Biełaviežy... Usio heta adbyvajecca pry jaho ŭdziele i dziakujučy jamu.
U Hajnaŭcy SŁD pačuvajecca tryvała. Pa vynikach apošnich vybaraŭ u paviatovaj radzie akazałasia 10 deputataŭ ad Sajuzu ź siamnaccaci. Ułasna, tolki dziela hramadzkaha spakoju starasta pastanaviŭ stvaryć kaalicyju ź Biełaruskim narodnym vybarčym kamitetam (biełaruskija dziejačy i Polskaja sialanskaja partyja).
Cimaševič naradziŭsia ŭ Varšavie, ale ŭžo niekalki hod jon aranduje chatu ŭ lesie za niekalki kilametraŭ ad Hajnaŭki. U svoj čas tam užo paśpieŭ pahaściavać Joška Fišer. Cimaševič dbaje pra svoj spakoj: jon puściŭ fotakarespandentaŭ, ale paprasiŭ, kab jany nie vydavali nazvy i dakładnaha miescaznachodžańnia siadziby. Choć tutejšyja, samo saboj, i tak viedajuć, dzie jana znachodzicca.
