Navat Łukašenka pačaŭ z Kupały.
U Laŭkach pad Voršaj adznačyli 123-ci dzień narodzinaŭ Janki Kupały. Navat prezydent pa-svojmu jaho ŭšanavaŭ. Svajo turne pa Aršanščynie 7 lipienia jon pačaŭ z pachodu ŭ Kupałaŭski muzej. Što praŭda, aficyjnyja ŚMI hety vizyt zamoŭčali: u muzej Łukašenka pajšoŭ a vośmaj ranicy, a «aśviatleńnie» pačałosia ź dziasiataj — z Kopysi, dzie jon naradziŭsia.
9 lipienia pad Laŭkami sabralisia amatary rodnaha słova na Śviata volnaj biełaruskaj paezii. Pieravažna heta byli ŭdzielniki Drazdovickaha litaraturna-mastackaha pleneru, što sioleta pryśviačaŭsia pamiaci Karatkieviča. Dałučyŭsia navat miascovy žychar, jaki na rovary prajaždžaŭ paŭz fest: dziadźka nie sumieŭsia, a pračytaŭ bajku.
Spalenyja soncam pleneraŭcy źjechalisia na svaje zaniatki. Dyscyplinu j raskład pilnavaŭ stalovy pracaholik Andrej Chadanovič, tamu pierakładčyckaja majsternia skančałasia navat pry lichtary. I paśla aficyjnaj častki śviata pačałasia nieaficyjnaja. Kala vohnišča zmoh vystupić sa svaimi vieršami ci pieśniami kožny achvotny. Nie abyšłosia bieź impravizavanych pryzoŭ: padarunkam ad Hieorhija Lichtaroviča stała kniha «Lichtaryki», ad Źmitra Višniova — «Trap dla suślikaŭ», a ad Valanciny Hrakun ź Biešankovič — zborniki vieršaŭ tamtejšych paetaŭ dy kniha prozy Volhi Ipatavaj z aŭtohrafam aŭtarki.
Inicyjatary pleneru — Ada Rajčonak i Vadzim Barščeŭski — vykazali nadzieju, što ŭ chutkaj budučyni takija festy ŭźniknuć pa ŭsioj Biełarusi: dazvoł na piknik brać nia treba, a paety — sol našaj nacyi.
