U noč na 24 lipienia na siadzibu HA «Tavarystva biełaruskaj movy imia Franciška Skaryny» byŭ zrobleny złačynny napad: šylda, uvachodnyja dźviery i ścieny byli zapeckanyja čornaj farbaj, na miescy złačynstva nieviadomyja pakinuli nalepki sa svastykaj (emblemaj NBP — nacyjanał-balšavickaj partyi).
Da aficyjnaha paviedamleńnia ab napadzie na siadzibu TBM na sajcie Mienskaha adździaleńnia NBP u 2:28 (http://belnbp.fastbb.ru) było źmieščana dakładnaje apisańnie napadu i vykazana poŭnaja padtrymka hetaj akcyi.
Pakolki pryviedzienyja fakty śviedčać za toje, što akcyja napadu na siadzibu HA «Tavarystva biełaruskaj movy imia F.Skaryny» maje vyrazna palityčnuju afarboŭku, my źviartajemsia ŭ KDB z patrabavańniem znajści złačyncaŭ i pakarać ich u adpaviednaści z zakonam.
Isnavańnie sajtu NBP i jaho infarmataraŭ dazvalaje spadziavacca, što KDB zdoleje chutka znajści złačyncaŭ.
Sakrataryjat HA «TBM imia F.Skaryny»
∎
NBP — heta małaletki?
U noč na 24 lipienia ŭvachodnyja dźviery j šyldu na siadzibie Tavarystva biełaruskaj movy ŭ Miensku chulihany zalili čornaj farbaj i abkleili nacyjanał-balšavickimi ŭlotkami. Pradstaŭniki arhanizacyi padali zajavu va ŭpravu milicyi Partyzanskaha rajonu Miensku. Namieśnica staršyni TBM Alena Anisim u hutarcy z karespandentam «NN» 27 lipienia skazała, što pakul što nijakich viestak ad milicyi nie było. Učastkovy Andrej Žołudzieŭ, jaki viadzie spravu, zaznačyŭ, što śviedkaŭ zdareńnia znajści nie ŭdałosia: «Chutčej za ŭsio, heta małaletki. U našym rajonie heta adzinkavy vypadak, tamu składana skazać, jak chutka ŭdasca niešta vyśvietlić».
Źmicier Dziadzienka
