Adlustravańniem miortvaha stanu SND na samicie ŭ Kazani mohuć stać nia tolki abiacanyja ŭkrainskija inicyjatyvy, ale i tlejučy kanflikt unutry aparatu vykankamu Sadružnaści.
Pieršyja hady stvoranaj na abłomkach SSSR Sadružnaści Niezaležnych Dziaržaŭ kožny samit supravadžaŭsia pryhožymi abiacańniami lepšaha žyćcia, što akazvałasia čarhovymi iluzijami. A ŭ mienskaj štab-kvatery aparat SND praciahvaje sam pa sabie vałtuzicca, płodziačy prajekty dakumentaŭ, jakich nichto nie vykonvaje. Varta nahadać, što kiraŭnik vykankamu SND Uładzimier Rušajła ŭvieś čas siadzić u Maskvie, a funkcyjanavańnie mienskaha ofisu zabiaśpiečvaje jaho pieršy namieśnik Dźmitry Bułachaŭ. Toj, što pracavaŭ u 1994-m u pieradvybarnym štabie kandydata ŭ prezydenty Łukašenki.
Pryjšoŭšy da ŭłady, Łukašenka zabyŭ šmat kaho sa svaich pamočnikaŭ, siarod jakich apynuŭsia i ambicyjny eks-deputat Bułachaŭ. Ale ŭ adroźnieńnie ad inšych, adchilenych ad «karyta», praź niekalki hod daśviedčany juryst i były śledčy znoŭ spatrebiŭsia pravicielu i byŭ pasadžany ŭ fatel pieršaha namieśnika staršyni vykankamu SND.
Praca ŭ sadružnaści z maciorym aparatčykam Jurjem Jaravym, jaki tady ŭznačalvaŭ vykankam SND, u adnosna maładoha jaho pieršaha namieśnika ładziłasia. Niama padstaŭ śćviardžać, što z prychodam na miesca Jarava inšaha mianta, Rušajły, kamfotny stan u Bułachava zachavaŭsia. Dahetul jon zabiaśpiečvaŭ nadziejny kantrol Łukašenki nad usioj rabotaj mienskaj štab-kvatery SND. Čaho pakul nijak nie ŭdajecca zrabić ź inšym intehracyjnym orhanam — Pastajannym kamitetam Sajuznaj dziaržavy. Havarlivaha P.Baradzina padazrajuć u nieabhruntavanych rastratach ścipłaha biudžetu virtualnaj dziaržavy.
Jak viadoma, prajekt novaj supolnaści, što pamianiała šyldu na Sajuz Biełarusi i Rasiei (SBiR), zaklikany byŭ nadać novy impuls intehracyi na postsavieckaj prastory. Jaho ŭdzielniki nazyvajuć SBiR samym prasunutym intehracyjnym prajektam. Praŭda, padstavovyja punkty dahetul niabačanaj u śviecie sajuznaj dziaržavy, jakimi źjaŭlajucca adzinaja valuta i Kanstytucyjny akt, praciahvajuć zastavacca ŭ tumanie mroj. I ŭtvareńnie hetaje ŭsio čaściej stali nazyvać pa analohii z adnoj z razreklamavanych sumiesnych prahram — «Sajuzny televizar». A nakont, pavodle aznačeńnia Pucina, «klubu dla razvodu», jakim była nazvanaja SND, i naahuł adsutničajuć prymiety žyćcia. Zastałosia tolki aficyjna kanstatavać śmierć Sadružnaści.
Dziela novaha žyćcia na razvalinach savieckaj imperyi byłyja braty i siostry pačali stvarać roznyja struktury pa haryzantali: HUAM, EŭrAzES, ADKB, AEP. A zusim niadaŭna ŭ Baržomi prezydenty Ŭkrainy i Hruzii paviedamili ab tym, što źbirajucca stvaryć novuju mižnarodnuju strukturu — Supolnaść demakratyčnaha vybaru, jakaja musić abjadnać demakratyi bałta-čarnamorska-kaśpijskaha rehijonu. Paśla sustrečy ŭ «Arteku» ŭžo čatyroch prezydentaŭ stała vidavočna, što Ŭkraina, Hruzija, Polšča i Litva pavinny skłaści kaściak budučaj struktury.
Ukrainskaje MZS, kamentujučy ideju prezydentaŭ, zapeŭnivaje: novaja struktura nia budzie procipastaŭlać siabie SND. «Supolnaść demakratyčnaha vybaru» nia moža być alternatyvaj SND ni pa paklikańni, ni pa pryznačeńni», — zajaviŭ kiraŭnik MZS Ukrainy Barys Tarasiuk, adznačyŭšy, što SND za ŭsie hady svajho isnavańnia nia zdoleła vyrašyć prablem krain-udzielnic. Inšymi słovami, na dumku spadara Tarasiuka, Supolnaść demakratyčnaha vybaru ŭsio ž zdoleje niejkija prablemy vyrašyć. Bolš za toje, miarkujuć naziralniki, kali jaje inicyjataram udasca realizavać svaju ideju, ich prajekt moža stvaryć bahata prablem Maskvie. I vyjavicca jany pavinny ŭžo na kazanskim samicie SND.
Jak rastłumačyŭ pieršy namieśnik kiraŭnika vykankamu Sadružnaści Dźmitry Bułachaŭ, adno z asnoŭnych pytańniaŭ naznačanaha na 26 žniŭnia ŭ Kazani pasiadžeńnia Rady kiraŭnikoŭ dziaržaŭ SND — udaskanalvańnie i refarmavańnie orhanaŭ Sadružnaści Niezaležnych Dziaržaŭ. Čas dyktuje novyja zadačy i novyja formy raboty ŭ ramkach SND, zajaviŭ Bułachaŭ. Razam z tym, jon udakładniŭ, što na samicie prapanujecca vyrašyć pytańni techničnaha charaktaru, adnak Sadružnaść moža stać bolš dziejsnaj arhanizacyjaj, kali dziaržavy SND zdolejuć naładzić ščylnaje supracoŭnictva va ŭsich sferach žyćciadziejnaści — ekanamičnaj, sacyjalnaj, humanitarnaj, u pytańniach procistajańnia novym vyklikam i pahrozam sučasnaści. Z ulikam pasoŭvańniaŭ lideraŭ krain SND, što adbyvajucca pa haryzantali, nadziejam Bułachava nie nakanavana spraŭdzicca. Zrešty, jak i prapanovam «vyrašyć pytańni techničnaha charaktaru, źviazanyja z kolkaściu aparatu». Sadružnaść biesperspektyŭnaja. I vodhałasam realnaj sytuacyi ź joj jość niekatoryja zakulisnyja spravy ŭ vykankamie SND.
Pavodle nieaficyjnaj infarmacyi, užo nie adzin miesiac tleje niežartoŭny kanflikt pamiž kiraŭnikom vykankamu SND i jahonym pieršym namieśnikam. Adsutničaje asabisty kantakt pamiž imi, što vyhladaje jaŭna nie narmalna. Čynoŭniki kažuć, što kanflikt dasiahnuŭ takoha napružańnia, što Bułachaŭ demanstratyŭna admoviŭsia jechać u Maskvu da svajho načalnika z prajektam paradku dnia samitu ŭ Kazani. A Rušajła ŭsialak demanstruje nikčemnaść svajho pieršaha namieśnika, časam sprabujučy prynizić Bułachava pierad padnačalenymi. To nibyta biaź viedama haspadara ŭskryvajecca pracoŭny kabinet Bułachava, to raspaŭsiudžvajucca «źvierchu» ŭsialakaha kštałtu čutki pra jahonaje maralnaje abličča. Kampetentnyja krynicy śćviardžajuć, što Bułachaŭ, jaki pradstaŭlaje Respubliku Biełaruś, faktyčna adchileny ad spraŭ, źviazanych z zabieśpiačeńniem dziejnaści najvažniejšych orhanaŭ Sadružnaści — Rady kiraŭnikoŭ dziaržaŭ i Rady ministraŭ zamiežnych spraŭ. Mienavita Bułachaŭ kuryravaŭ pytańni lehitymacym vynikaŭ vybaraŭ na postsavieckaj prastory.
Usio heta možna było b śpisać na zvyčajnyja aparatnyja intryhi, kali b nia byŭ Bułachaŭ kreaturaj Łukašenki. A ŭ Maskvie nie vyśpiavała kryminalnaja sprava ab Rušajłu z padačy dumskaha «adzinarosa» Chinštejna. Moža, i pra spravy smutnyja ŭ vykankamie SND havaryli ŭ Zavidavie zaklatyja sajuźniki. I ŭ Kazani ŭsie ŭdzielniki samitu buduć hadać: chto ž sa skandalnych čynoŭnikaŭ u aparacie SND zastaniecca «žyvym»?
∎
Rasieja šantažuje krainy SND
Rasieja maje namier kardynalna źmianić palityku na postsavieckaj prastory, i heta tyčyć nia ctolki jaje dačynieńniaŭ z krainami SND, kolki z ZŠA i dziaržavami EZ. «Sutnaść novaha kirunku palityki zaklučajecca nia ŭ tym, kab adnavić niejki ŭpłyŭ Rasiei, niby stračany ŭ vyniku Aranžavych revalucyj. Jaho i nie było, byli tolki marna patračanyja hrošy i kradziažy rasiejskaha hazu. Meta zaklučajecca ŭ tym, kab stasunki Maskvy z Vašynhtonam i eŭrapiejskimi strukturami na terytoryi byłoha SSSR nabyli cyvilizavany charaktar», — zajaviła vysokapastaŭlenaja krynica ŭ Kramli.
«U nas chopić ciarpieńnia, navat kali na heta spatrebiacca hady, kab rastłumačyć svaim partneram pa SND, što Maskva nie źbirajecca adnaŭlać savieckuju imperyju, — adznačyła krynica. — Adnak Rasieju nie zadavalniaje stanovišča, pry jakim jana faktyčna subsyduje ekanomiku šerahu krain, pastaŭlajučy im enerharesursy pa stratnych dla siabie cenach, a narody tam pa-raniejšamu haładajuć. Mienavita takija sytuacyi i stvarajuć hlebu dla Aranžavych revalucyj. U kramli pryznajuć, što Rasieja sama dapuściła surjoznyja pamyłki: u 1990-ja nie było ni hrošaj, ni času, ni palityčnaj voli, kab zajmacca ŭmacavańniem Supolnaści.
Hety vyciek infarmacyi skiravany na adras Biełarusi, bo mienavita Biełaruś spažyvaje rasiejskija enerhanośbity pa lhotnych cenach i akurat u Biełarusi mnohija analityki bačać hlebu dla Aranžavaj revalucyi. Hetak svojeasabliva Maskva nahadvaje svajmu nibyta «sajuźniku» Alaksandru Łukašenku pra dahetul nie padpisanaje mižuradavaje pahadnieńnie pra pastaŭki hazu ŭ 2006 hodzie i zatrymku z vyjezdam pasła Ajackava.
Pavodle RIA «Naviny»
