Biespartyjnyja VIP-apazycyjanery traciać upłyŭ.
Piša Źmicier Dryhajła.
Na minułym tydni Vasil Lavonaŭ, Alaksandr Vajtovič i Valer Frałoŭ prezentavali novy blok. Ale padkreślivajuć, što heta nia blok. A taksama — nia ruch, nie kaalicyja. Što ž tady? Pahadnieńnie troch asobaŭ, kažuć, jakoje stavić za metu ŭ vyniku ni mnoha ni mała poŭnaściu źmianić raskład biełaruskaj palityki šlacham niedapuščeńnia Alaksandra Łukašenki da ŭdziełu ŭ vybarach 2006 hodu.
Anansavałasia taksama prysutnaść na imprezie sp. Uładzimiera Parfianoviča, da jakoha palityčnaja tusoŭka z roznych bakoŭ pryhladałasia jak da adnaho z perspektyŭnych lideraŭ biełaruskaj palityki. Nia spraŭdziłasia. A na hety raz Parfianovič nie pryjšoŭ. Adnadušša siarod troch nakont hetaha nie było. Adzin skazaŭ, što Parfianovič dumaje. Druhi — što chvareje. Treci — što abaviazkova dałučycca, ale praź niekatory čas.
Napiaredadni imprezy anansavali taksama Marynu Bahdanovič, jakoj u vyniku hetaksama nie było. Iznoŭ roznyja versii z roznych krynicaŭ — što jaje ŭ apošni momant adhavaryŭ jaje partyjny lider Anatol Labiedźka, što jaje admysłova nie zaprasili da žurnalistaŭ z-za taho, što, maŭlaŭ, ranh nia toj, nia ŭsich ža zaprašać, i navat što jana pra hetuju inicyjatyvu naahuł nia viedaje.
Uładzimiera Kołasa nie anansavali. Ale ŭsio ž čakali, što jon taksama budzie. Jany ž z Frałovym apošnim hod amal poruč išli, plus Kołas zaraz biespartyjny, da «piacierki» ź «dziasiatkaj» nie prybity, tak by mović, ni pry kim. Značyć, Kołasu niešta niedaprapanavali. Ci jon vyrašyŭ pačakać. Tym bolš što jaho j tak dva miesiacy ŭžo nie čuvać i nie vidać.
Kazulina j nie čakali. U jaho svaja hulnia. Ale cikava toje, što jon za tydzień tak i nie prakamentavaŭ hetuju inicyjatyvu. Chiba ličyć niesurjoznaj? Ci taksama ŭ adjeździe?
Zastajecca niajasnym, na jaki kadravy resurs maje abapiracca «nia ruch, nia blok i nie kaalicyja» i na jakija resursy raźličvaje. Jaŭhien Ahurcoŭ na nmnby.org miarkuje, što zajava Vajtoviča-Lavonava-Frałova asłablaje demakratyčnyja siły. «Biełorusskaja hazieta» ŭ materyjale pra akademika Vajtoviča zaŭvažaje, što hetaja hrupa palitykaŭ nia viedaje, jakim čynam realizavać svaju hałoŭnuju metu — nie dapuścić Łukašenki da ŭdziełu ŭ vybarach. «Biełorusskij rynok» i «Narodnaja vola» abmiežavalisia karotkaj infarmacyjaj pra zajavu troch palitykaŭ.
U 2000—2001 hadach kožny ruch adzinokich VIPaŭ byŭ u fokusie ŭvahi ŚMI. Adnak kredyt davieru źmianšaŭsia, bo hučnyja zajavy nie padmacoŭvalisia realnymi dziejańniami. Źmianšajecca i cikavaść da ich u Rasiei i na Zachadzie. U Maskvie paprostu nichto ŭsurjoz nie hatovy hulać suprać Łukašenki. Zachad ža nia bačyć u pradstaŭnikoŭ zbuntavanaj namenklatury realistyčnaha planu dziejańniaŭ.
«Adzinokija palityki» byli ŭ centry prezydenckaj kampanii-2001, ale pa miery kansalidacyi aŭtarytaryzmu jany tracili svaju finansavuju i infarmacyjnuju bazu. Vychavanyja ŭ namenklaturnaj etycy, jany ź ciažkaściu prystasoŭvajucca da dziejnaści ŭ napaŭpadpolli, u jakim trymaje apanentaŭ režym. Vyhladaje, što kampanija-2006 stanie niaroŭnym bojem łukašenkaŭcaŭ, jakija manapalizavali dziaržavu, i «arhanizavanaj» demakratyčnaj apazycyi. Demakraty razhladajuć patencyjnaha treciaha jak lišniaha ŭ hetym raskładzie. A łukašenkaŭcy bačać u «treciaj sile» kankurenta na rasiejskim nakirunku, jaki moža spravakavać Maskvu na nieadekvatnyja ruchi. A nu ž zduru padumaje, što ŭ Biełarusi moža być palityk bolš prarasiejski za Łukašenku.
