«Rasieja prahniła. Pucin zaja...aŭ» — pad takim lozunham rasiejskaja apazycyja praviała 17 vieraśnia akcyju «Antykapitalizm-2005». I skandavała: «Łukašenka zamiest Pucina!»
Rasiejski marš «Antykapitalizm» — poŭny postmadern: kapitalisty spačuvajuć čyrvonym, bamžy tančać z pankami taniec «poha», pamiarkoŭnyja biełaruskija revalucyjanery rastuć. «Moscow Times», buržuaznaje vydańnie, jakoje čytajuć rasiejskija japi i klerki zamiežnych firmaŭ, zakončyła repartaž z akcyi hnieŭnym najezdam na milicyju. Hazecie, bačycie, nie spadabałasia, što achoŭniki paradku źbili panka, jaki roŭ «Mačy systemu!».
Rasiejski «Marš svabody»
Piać hadoŭ tamu hrupa maładych «anpiłaŭcaŭ» pryjšła da vysnovy: maskoŭskaje «babina leta» musić abudžać harmon klasavaj baraćby. Tak i ŭźnikła ideja maršu «Antykapitalizm» — kožnuju vosień defilavać pa Bulvarnym kalcy, vymahajučy restaŭracyi SSSR. U pieršym šeści ŭziali ŭdzieł paru sotniaŭ maładych kamunistaŭ dy pankaŭ. Apošnim bolš padabałasia nie perspektyva reanimacyi Sajuzu, a abiacany arhanizatarami chalaŭny kancert z udziełam Letava.
Ńjusmejkieram «Antykapitalizm» staŭ u 2003 h. — kali nacboły z dapamohaj «kaktejlaŭ Mołatava» prataranili liniju AMONaŭcaŭ. Cieraz hod na akcyju vypaŭzła ŭsia levaradykalnaja i alternatyŭnaja tusoŭka Maskvy. Padrychtavałasia tady i milicyja — kare vakoł kalony demanstrantaŭ składali vieršniki. U takim pačesnym eskorcie «antykapitalisty» prajšli na pryznačanaje miesca, a pasłuchaŭšy rokieraŭ, mirna razyšlisia pa chatach.
Ich adkaz «Našym»
Marš-2005 čakali ź nieciarpieńniem. Napiaredadni nieviadomyja atakavali arhkamitet na «Aŭtazavodzkaj». Dy jak atakavali! Na akcyi daviałosia pabačyć adnu z achviaraŭ nalotu — chłopcu bejsbolnymi bitami złamali abiedźvie ruki. Žurnalisty adrazu vysunuli versiju: sprava futbolnych fanataŭ, jakich verbuje «Puciniuhiend». Z «čyrvonaha šabasu» marš sioleta pieratvaryŭsia ŭ akcyju suprać pahrozy pucinskaha aŭtarytaryzmu.
Na miesca zboru ŭdzielnikaŭ maršu zadoŭha da jaho pačatku pačali źjaždžacca žurnalisty — sami manifestanty jašče spali. I pakul jany čyścili zuby, apranalisia dy treślisia ŭ metro, ja paśpieŭ abmianiacca apošnimi navinami z kalehami pa cechu.
Vyśvietliłasia, što zatrymanych fanataŭ padčas bojki na «Aŭtazavodzkaj» vyciahvaŭ ź milicyi pradstaŭnik kramloŭskaj administracyi. Chadzili taksama plotki, što sioleta marš zafundavaŭ Dźmitry Rahozin z «Radzimy», inakš naŭrad by takija raskručanyja hurty jak «Priklučienija elektronikov» abo «Naiv» pahadzilisia vystupić na mitynhu.
Pasieli ŭ łužu
Narešcie apazycyjanery pašychtavalisia ŭ kalonu. Tut byli maładyja ziuhanaŭcy (kamsamoł), moładzievaja filija partyi «Rodzima» (hetyja — jaŭnyja prajdziśviety), «Avanhard Čyrvonaj moładzi» (AKM) i nacboły, što praŭda biaz Edzički. «U jaho ciapier novaja kachanka, kinazorka i, naturalna, jamu nie da baraćby z kapitalizmam», — źjedliva iranizavali ŭ kalonie. Asobny mabilny blok stvarali panki i tusoŭščyki. Jany chaatyčna chadzili tudy-siudy. Heta ŭsio było ŭpakavana ŭ ačapleńnie milicyi.
Pačaŭsia sapraŭdny doždž. Užo rušyli, jak uźnik incydent, jaki i staŭ kulminacyjaj usiaho mierapryjemstva. AKMaŭcy vykinuli raściažku «Rasieja prahniła. Pucin zaja..aŭ». Mianty aperatyŭna kanfiskavali transparant. U adkaz kiraŭnik «Avanhardu» Karčahin zajaviŭ, što marš nie startuje, pakul jamu nia viernuć «pryvatnaj ułasnaści». Najbolš radykalnyja admarozki pasieli na ziamlu (u łužy!), sčapiŭšysia rukami. Mianty zabiehali, u ich mazhach pačali prakručvacca siužety repartažaŭ navinaŭ: «Marš nie adbyŭsia, bo milicyja kanfiskavała va ŭdzielnikaŭ transparant «Rasieja prahniła. Pucin zaja…aŭ». Raściažku viarnuli z umovaj, što manifestanty nia buduć jaje demanstravać.
Nastupnym razam u Kijevie
Urešcie, marš pačaŭsia. Doždž załupiŭ jašče macniej, i šeście nabyło cikavy farmat. Udzielniki, a taksama milicyjanty j «taptuny» čas ad času zabiahali napierad, kab znajści niejkuju kaviarniu dy sahrecca harbatkaj — prodaž alkaholu ŭ kvartale zabaranili. Paśla znoŭ viartalisia ŭ palityčny praces. U punktach hramadzkaha charčavańnia panavała niezvyčajnaja atmasfera. Za adnym stolikam razmaŭlali pra toje, ci iści na šturm pryjomnaj prezydenta, za susiednim — pra toje, kaho i jak «viazać».
Cieraz hadzinu dziŭnaje šeście dasiahnuła mety — placu Kiryły i Miatoda. Prajšoŭšy praz praceduru asabistaha kantrolu, manifestanty zrabili ludzkoje paŭkoła vakoł sceny. «Priklučienija elektronikov» skončyli hrać hit 1980-ch «Cudoŭnaje daloka», addaŭšy mikrafon arataram. Doždž liŭ jak ź viadra.
Vystupy narodnych trybunaŭ byli stereatypnyja — u duchu adviečnych pytańniaŭ «Chto vinavaty» (ułady, Pucin), «Što rabić» (revalucyju i adradžać SSSR). Rabočy kvartał zaśpiavaŭ «Lenin, partyja, kamsamoł». Panki i bamžy, biaź ich nijak, źlilisia ŭ brutalnym tancy «poha». Čas ad času bijamasu tancoraŭ zanosiła ŭ bok, i jany čaplali stvorany płot z barjeraŭ. Adubiełyja ad choładu i daždžu milicyjanery achvotna častavali ich dubinałam. Aryštavali 20 čałaviek. Pa skančeńni akcyi ŭ kaviarni «Kitajski lotčyk» ad bahiemnaj bracii daviedaŭsia cikavuju navinu: maskoŭskija palittechnolahi byccam kinuli vialikija hrošy, kab arhanizavać vyjezd rasiejskich nacbołaŭ 24 vieraśnia na «Antykapitalizm» u Kijeŭ. Apłaciać darohu i pražyvańnie. Sens zrazumieły — padhadzić Juščanku.
My raściom
Padčas maršu ja pabačyŭ «zakat nad bałotam» u kalonie AKM. Čas ad času ź nietraŭ «Avanhardu» skandavali: «Łukašenka zamiest Pucina!». Ščyra kažučy, bolš efektnaha antypijaru biełaruskaha kiraŭnika ja nia bačyŭ. Buržua hladzieli na amataraŭ rakiroŭki Pucin—Łukašenka jak na varjataŭ, mianty — jak na zaklatych vorahaŭ.
Paśla akcyi ŭziaŭ u nacbołaŭ-suajčyńnikaŭ, što pryjechali padtrymać rasiejskich tavaryšaŭ, ekspres-interviju.
— Nakolki vy blizkija z «rasiejskimi tavaryšami»?
— U nas padobnyja zadačy. Takija ž prablemy isnujuć i ŭ Biełarusi. Kali my budziem adzinyja, my pieramožam, i ŭsio ŭ nas atrymajecca.
— Rasiejskija nacboły padtrymali Aranžavuju revalucyju, a ŭ nas naadvarot zajmajucca baraćboj z apazycyjaj.
— Jany padtrymali nia Juščanku, a paryŭ narodu da pieramienaŭ. Jak skazaŭ Limonaŭ, revalucyjaner musić lubić evalucyi.
— Ale vy ličycie siabie revalucyjanerami, adnak da panujučaha režymu lajalnyja.
— My ŭ pamiarkoŭnaj apazycyi. U nas jość i supiarečnaści z Łukašenkam. Naprykład, my zmahajemsia ź biurakratyjaj, čynoŭnikami.
— Jak kankretna?
— U akcyjach, jakija my pravodzim. Namahajemsia naładzić supracoŭnictva z roznymi palityčnymi siłami. Pakul što raściom.
