Palak Ryšard Kapuściński byŭ uklučany ŭ śpis sioletnich kandydataŭ na atrymańnie Nobeleŭskaj premii pa litaratury. Naziralniki ličać, što sioleta ŭznaharodu mahli atrymać litaratar-dakumentalist, filozaf ci litaraturaznaviec.
U pahałoskach paŭtarajucca tyja samyja imiony, što i ŭ papiarednija hady: amerykancy Filip Rot i Džojs Kerał Oŭts, albaniec Ismaił Kadare, Amas Oz ź Izrailu, švedzki paet Tomas Transtromer. Šmat chto z naziralnikaŭ, adnak, spadziavaŭsia, što sioleta Švedzkaja akademija zrobić usim prymietnuju niespadziavanku, adznačyŭšy ŭznaharodaj inšy rod litaratury, čym paezija ci proza.
«Źjaŭlajucca vykazvańni, što Akademija choča pašyryć sferu knih, jakija ŭznaharodžvajucca. Heta moža aznačać, što daroha da litaraturnaj Nobeleŭskaj premii adkryvajecca dla takich piśmieńnikaŭ, jak polski reparter Ryšard Kapuściński», — ličyć Eva Boner, dyrektar švedzkaha vydaviectva «Boner».
Praciahły čas Nobeleŭskaja premija pa litaratury pryznačałasia paetam ci prazaikam. Adnak z zaviaščańnia Alfreda Nobela hetaha zusim nie vynikaje, tam niama nijakich abmiežavańniaŭ u planie litaraturnych žanraŭ, jakim addajuć pieravahu patencyjalnyja kandydaty na ŭzharodu. Bolš za toje, u historyi Nobeleŭskaj premii pa litaratury byli vypadki, kali ŭznaharodžvalisia inšyja litaraturnyja žanry, čym paezija i proza: naprykład, u 1950 h. «nobela» atrymaŭ Bertran Raseł, a praz try hady — Uinstan Čerčyl za histaryčnyja pracy.
«U historyi Nobeleŭskaj premii apošnich hod daminuje «estetyčnaja» litaratura. Ale litaratura mianiajecca, i Nobeleŭskaja premija evalucyjanuje razam ź joj. Moža, nastaŭ čas Nobeleŭskaj premii dla litaratury faktu», — skazaŭ AFP Haracyjo Enhdal, prezydent Švedzkaj akademii.
gazeta.pl
