Pryz amerykanskamu idyjotu

Pa tradycyi ŭ listapadzie prachodzić aŭtarytetnaja cyrymonija «MTV Europe Awards». Sioleta jana prajšła ŭ Lisabonie. Hetym razam u modzie spakojnyja śpievy ścipłaha Krysa Marcina, «Coldplay» i pank-opera «American Idiot» ad «Green Day». Na chvali papularnaści praciahvajuć trymacca Robi Ŭiljamz i malavanyja persanažy z «Gorillaz».

Pierajemnik «Radiohead» i Breda Pita

Siem hod tamu chłopcy z «Coldplay» hrali ŭ hurcie «Starfish», što z razmoŭnaj anhielskaj pierakładajecca nie inačaj, jak «analnaja adtulina», pa zašmalcavanych anhielskich pabach za tak. Ciapier jany źbirajuć stadyjony, a ich albomy — lidery ŭ eŭrapiejskich i amerykanskich čartach. Lišni raz šalonuju papularnaść «Coldplay» zaśviedčyła cyrymonija «MTV Europe Awards» u Partuhalii. Brytanski kvartet atrymaŭ dźvie prestyžnyja ŭznaharody — «Najlepšaja kampazycyja» i «Najlepšy vykanaŭca ŭ Vialikabrytanii i Paŭnočnaj Irlandyi». Lider hurtu Krys Marcin u interviju časopisu «Rolling Stone» sfarmulavaŭ dźvie svaje zvyšmety — namahacca być vartym pierajemnikam «Radiohead» i nia mienš vartym pierajemnikam Breda Pita (žonka Krysa — Hvinet Pełtroŭ).

Redki vypadak — brytanski rok-hurt zajmieŭ pośpiech va ŭsim śviecie: ich lubiać i ŭ Japonii, i ŭ Amerycy (dzie za pieršy tydzień prodažaŭ ich albom «X&Y» razyšoŭsia nakładam u 773 000 asobnikaŭ). Dyj K.Marcin — nietypovy rok-muzyka: redka dazvalaje sabie skandalnyja vykazvańni, dobry siemjanin i ścipły tvorca (nia toje što ŭ maładyja hady). «My — kupka talenavitych plahijataraŭ. Usie našy pieśni napisali raniej inšyja, prosta my ich krychu pierarabili», — kaža lider «Coldplay».

Samy papularny vypivocha

Robi Ŭiljamz zaŭsiody siabie adčuvaje ŭpeŭniena — jon staŭ zorkaj jašče ŭ školnym uzroście, kali źniaŭsia ŭ teleseryjale, u 16 hod śpiavaŭ u papularnym boj-hurcie «Take That». U 22 hady Robi pačaŭ solnuju karjeru. Na sioletnim «MTV Europe Awards» jon u treci raz byŭ pryznany najlepšym eŭrapiejskim vykanaŭcam, a jaho apošni albom «Intensive Care» na minułym tydni lidziravaŭ u 16 čartach va ŭsim śviecie.

Uiljamz stała prysutničaje i na staronkach žoŭtaj presy: užo amal 10 hod žurnalisty žvava abmiarkoŭvajuć jaho prablemy z alkaholem i narkotykami.

U naminacyi «Najlepšy hurt» pieramahli «Gorillaz» — chłopcy, jakija ŭ svoj čas skarystali karysnyja zdabytki navukova-techničnaha prahresu i stvaryli całkam virtualny prajekt z malavanymi persanažami-muzykami. Choć imiony muzykaŭ užo daŭno raskrytyja, ad «Gorillaz» zaŭsiody budzie adbivacca tajamničy cień.

Vostrasacyjalnaść iznoŭ u modzie

«Green Day» źviarnuli na siabie ŭvahu nia tolki tamu, što pradstaŭlali amerykanskuju pank-muzyku. Ich novaja prahrama pad krasamoŭnaj nazvaj «American Idiot» była pryznanaja «Najlepšym albomam hodu». Ale jany nie śpiavajuć pra nianaviść da Buša, jak heta robiać šmat jakija amerykanskija pank-hrupy. Surjoznaja forma padačy — pank-rok-opera — śviedčyć pra ich šyryniu pohladaŭ. U «American Idiot» bolš spačuvańnia svaim suhramadzianam, čym nianaviści da vyšejšych čynoŭ. Spektar prablem, što ŭzdymaje «Green Day» — ad atupleńnia čałavieka praź ŚMI da pošuku pryčyn kanfliktu ŭ Iraku.

Siarod pieramožcaŭ «MTV Europe Awards 2005» akazaŭsia jašče adzin hurt, jaki ŭ svajoj tvorčaści ŭzdymaje sacyjalnyja prablemy. U naminacyi «Najlepšy alternatyŭny vykanaŭca» pieramohu atrymali chłopcy armianskaha pachodžańnia z «System of a Down». Paśla šalonaha pośpiechu ich albomu «Toxicity» ŭ 2001 h. jany ŭvajšli ŭ vyšejšuju lihu ciažkaj muzyki. Udzielniki hrupy nieadnarazova vyjaŭlali svaju hramadzianskuju pazycyju — udzielničali ŭ maršach pratestu dabračynnaha i pacyfisckaha charaktaru.

Uznaharoda hrupie «The Black Eyed Peas» jak najlepšamu pop-prajektu śviedčyć pra źmieny pryjarytetaŭ u hetym kirunku. Źjaŭleńnie pieršaha hita hetaj hrupy ŭ muzyčnych krytykaŭ entuzijazmu nia vyklikała, ale muzyki pajšli dalej za hanhsta-rep-absiahi. I ŭ vyniku tolki vyjhrali: u ich muzycy znajšłosia miesca nia tolki manatonnamu chip-chopu, ale i fanku, soŭłu i navat etna-matyvam.

∎

Pieramožcy MTV Europe Awards 2005:

najlepšy śpiavak — Robi Ŭiljamz;

najlepšaja śpiavačka — Šakira;

najlepšaja hrupa — «Gorillaz»;

najlepšaja rok-hrupa — «Green Day»;

najlepšy chip-chop vykanaŭca — «Snoop Dogg»;

najlepšy alternatyŭny vykanaŭca — «System of a Down»;

najlepšy rytm-end-bluz vykanaŭca — Ališa Kis;

najlepšy pop-vykanaŭca — «The Black Eyed Peas»;

najlepšy vykanaŭca ŭ Vialikabrytanii i Paŭnočnaj Irlandyi — «Coldplay»;

najlepšaja pieśnia — «Speed of Sound» («Coldplay»);