U Minskim abłasnym kadeckim vučyliščy, jakoje znachodzicca ŭ Słucku, 28 śniežnia čakajuć u hości Alaksandra Łukašenku. Pa słovach navučencaŭ, kiraŭnik dziaržavy prabudzie kala saraka chvilin, ale rychtujucca da jaho vizitu ceły miesiac.
— Vakacyi ŭ nas pieranieśli z 23 na 29 śniežnia, — padzialilisia navučency.
Jak raspaviali karespandentu «Salidarnaści» junyja kadety, da navahodniaha balu ŭ budynku zrabili ramont, na terytoryi vučylišča — novaja plitka i lichtary. A ŭ samoj navučalnaj ustanovie źjaviŭsia novy kłas z kampjutarami. Siudy pavinny pryvieści kiraŭnika dziaržavy, kab jon moh pahutaryć z vučniami, jakija lepš za ŭsich vałodajuć zamiežnymi movami.
— A prezident viedaje zamiežnyja movy?
— Napeŭna, — biantežycca kadet.
Śpiecyjalna da vizitu Łukašenki dla navučencaŭ pašyli kaściumy i balnyja sukienki za dziaržaŭny košt. A voś pryčoski dziaŭčynkam pryjdziecca rabić za svoj.
— Da nas pavinien byŭ pryjechać cyrulnik ź Minska, ale čamuści ŭsio admianiłasia. Dziaŭčynkam dali zadańnie kupić łaki, pienki, hieli, špilki. Ciapier jany trenirujucca rabić układki.
Nie va ŭsich vychavancaŭ vučylišča jość baćki. Niekatorych vychoŭvajuć babuli abo inšyja svajaki, jakim i pryjšłosia ŭziać na siabie hetyja traty.Pa padlikach navučencaŭ, pryčoska abyjdziecca kadetcy prykładna ŭ 200 tysiač rubloŭ.
Maštabny ramont vučylišča i vydatki na pryčoski słuckim kadetkam zdajucca drobiaźziu ŭ paraŭnańni z tym, jak rychtavalisia da sustrečy ź pieršaj asobaj krainy ŭ inšych rehijonach: karovam farbavali kapyty, u palaŭničych zabirali strelby i navat adstrelvali hałuboŭ.
— Pakul nieviadoma, ci pryjedzie jon z małodšym synam, — raspaviadaje inšy vychavaniec kadeckaha vučylišča. — Ale dziaŭčynka repieciruje vals, kab z Kolem tancavać.
— A jak jaje vybirali? Byŭ niejki kastynh?
— Ničoha nie viedaju, — kaža surazmoŭca. — A voś z prezidentam budzie tancavać dziaŭčynka ź Viciebskaj vobłaści.
Usie chvalujucca, a raptam Łukašenka jaje spytaje i daviedajecca, što jana nie ź Minskaj vobłaści. Što tady?
Ale miarkujučy pa razmovy z kadetami ź inšych kłasaŭ, nijakich ekspromtaŭ padčas vizitu kiraŭnika dziaržavy nie čakajecca: usio projdzie pa scenary.
— Nam dasłali pytańni, jakija jon budzie zadavać, — raspaviadajuć padletki. — I našy adkazy taksama.
Pierad Novym hodam navat kiraŭniki tatalitarnych krain chočuć vyhladać u vačach paddanych jak dobry Dziadula Maroz.I na samaj spravie, nie budzie ž Łukašenka ładzić čynoŭnikam publičnuju łupcoŭku pry dzieciach abo pahražać turmoj načalnikam pradpryjemstvaŭ.
Pieršy vypusk kadetaŭ.