U intervju BiełaPAN jon źviarnuŭ uvahu na niadaŭniaje paviedamleńnie ŭ ŚMI ab mahčymym prodažy rasijskim pradprymalnikam pomnika pałacava‑parkavaj architektury XIX‑XX stahodździaŭ siadziby ŭ vioscy Kraski Vaŭkavyskaha rajona Hrodzienskaj vobłaści na bierazie raki Zalvianka.
Pavodle jaho słoŭ, hetaja unikalnaja siadziba źjaŭlajecca pomnikam respublikanskaha značeńnia. «Heta aznačaje, što ŭsie raboty pa restaŭracyi i prystasavańni budynka buduć pravodzicca pad kiraŭnictvam navukovaha kiraŭnika, a taksama pad kantrolem hramadskaści, u tym liku inśpiektaraŭ tavarystva», — padkreśliŭ A.Astapovič. Razam z tym, pavodle jaho słoŭ, siadziba źjaŭlajecca abjektam nieruchomaści, «i ŭ Maskvu jaje nie vyviezieš». «Pry hetym miascovyja ŭłady vałodajuć mizernymi šancami znajści ajčynnaha pradprymalnika z takim svabodnym kapitałam, jaki dazvoliŭ by biźniesmienu nabyć takuju siadzibu», — zaznačyŭ A.Astapovič. Jon padkreśliŭ, što dla pomnika takoha značeńnia razmova moža iści tolki ab zdačy ŭ arendu na 99 hadoŭ, a nie ab prodažy va ŭłasnaść. «Pa reštavym košcie ŭłady mohuć pradavać tolki pomniki architektury rehijanalnaha značeńnia», — skazaŭ A.Astapovič.
Kraskaŭskaja siadziba ŭklučaje pałac retraśpiektyŭna‑zamkavaha stylu, uźviedzieny ŭ 1839‑1905 hadach, šerah draŭlanych i cahlanych pabudoŭ, a taksama piejzažny park płoščaj try hiektary z sažałkaj. Pałac ujaŭlaje saboju draŭlany adnapaviarchovy korpus z prybudavanym da jaho dvuchpaviarchovym cahlanym abjomam, viertykalnyja daminanty jakoha — kruhłaja i kvadratnaja ŭ siačeńni viežy z zubčatymi parapietami i fluhierami. Hałoŭny ŭvachod u siadzibu aformleny vysokim hankam i strelčatym partałam z čatyrma vuhłavymi pinaklami. Budynak vyłučajecca raznastajnaściu elemientaŭ dekoru fasadaŭ.
