Minčuka, jaki zaviaščaŭ svaju kvateru dziaržavie, zabili 12

Minčuk Dźmitryj Rakaŭčuk pakinuŭ svaju kvateru ŭ spadčynu Respublicy Biełaruś.

Pra heta biełarusy daviedalisia z učorašniaha paviedamleńnia pres-słužby kiraŭnika dziaržavy. «Alaksandr Łukašenka ŭzhadniŭ prajekt pastanovy Savieta ministraŭ „Ab pryniaćci ŭ respublikanskuju ŭłasnaść spadčynnaj majomaści“. Spadčyna ŭklučaje ŭ siabie kvateru na vulicy Bresckaj u Minsku, jakuju hramadzianin Biełarusi Dźmitryj Rakaŭčuk zaviaščaŭ Respublicy Biełaruś», — havorycca ŭ im.

Što heta za tajamničaja kvatera, los jakoj vyrašajecca na ŭzroŭni kiraŭnika dziaržavy, chto taki Dźmitryj Rakaŭčuk i čamu jon vyrašyŭ pakinuć jaje dziaržavie?

«Naša Niva» pastarałasia razabracca ŭ dziŭnaj situacyi.

Vokny byłoj kvatery Rakaŭčuka na druhim paviersie.

Dźviery apiačatanyja z dapamohaj štampaŭ "dla pakietaŭ".

Akuratnyja mietaličnyja dźviery. Nibyta haspadar adyšoŭ pa paru chvilin.

Kvatera, jakuju atrymała dziaržava, znachodzicca pa adrasie Bresckaja, 76. Dom byŭ pabudavany ŭ 1972 hodzie — zvyčajnaja piacipaviarchovaja panelka. Z voknaŭ bačnaje voziera i harnałyžny kurort «Soniečnaja dalina». Pra toje, što losam kvatery ŭ ich domie zajmajucca na samym vysokim uzroŭni, susiedzi čujuć upieršyniu. Ale paśla pačynajuć uzhadvać usiu tajamničuju historyju hetaj nieščaślivaj kvatery — № 66. Zrešty, my nie vyklučajem, što niemaładyja susiedzi mahli pryŭkrasić padziei — niešta za 40 hadoŭ i zabyłasia.

Takim čynam, kvateru ŭ novapabudavanym domie atrymała siamja — muž, žonka i dvoje dziaciej. Niaščaści ŭ kvatery № 66 pačalisia ź ich.

Žonka ŭ tym samym 1972 hodzie była paraniena padčas vybuchu ŭ futarałavym cechu Minskaha radyjozavoda na vulicy Sofji Kavaleŭskaj.

Sistema vientylacyi nie davała rady drobnamu pyłu, jaki ŭźnikaŭ padčas šlifoŭki futaraŭ dla televizaraŭ. Pažarnyja papiaredžvali prajekciroŭščykaŭ pra mahčymyja nastupstvy. Było dastatkova adnoj iskry, kab uvieś cech vybuchnuŭ. Heta i adbyłosia 10 sakavika 1972 hoda. Tady, pa roznych padlikach, zahinuła 120–140 čałaviek.

Muž staŭ śviedkam inšaj žachlivaj katastrofy.

Jon byŭ tym samym mašynistam elektryčki «Alachnovičy-Minsk», jakuju praź niapravilnyja pakazańni śviatłafora na stancyi Kryžoŭka 2 maja 1977 hoda prataraniŭ pasažyrski ciahnik «Hrodna-Vorša».

Na miescy zahinuła 19 čałaviek, jašče bolš za 80 čałaviek byli paranienyja.

U pačatku 1990-ych, paśla śmierci žonki, były mašynist pačaŭ žyć ź inšaj žančynaj. A kvateru na Bresckaj vyrašyŭ pradać. Pakupnikami ŭ vyniku stała siamja rasiejcaŭ Rakaŭčukoŭ, jakaja raniej žyła ŭ Mazyry.

Dźmitryj byŭ vajskoŭcam u adstaŭcy, jahonaja žonka Śviatłana — vykładčycaj fizkultury. Ź imi žyŭ i jaje syn ad pieršaha šlubu Alaksandr.

Kulturnaja siamja, kažuć žylcy padjezdu. Praŭda, z susiedziami źnizu i źvierchu u kvatery było niekalki kanfliktaŭ — u 66-j časam było šumna.

Tak ci inakš, u svajoj novaj kvatery jany pražyli trochi bolš za 10 hadoŭ, pakul Śviatłana, chvoraja na hipiertaniju, nie pamierła. «Insult», — rastłumačyŭ susiedziam Dźmitryj. Jaje cieła kremiravali, paśla čaho syn Alaksandr pajechaŭ chavać jaje na radzimu, u Rasiju.

Nieŭzabavie paśla jaho viartańnia, 23 vieraśnia 2012 hoda susiedzi ŭbačyli kvateru apiačatanaj. Ździŭlenym žylcam milicyjanty paviedamili, što

63-hadovy Dźmitryj Rakaŭčuk byŭ zabity.

Pavodle infarmacyi milicyi, mužčynu zabiŭ jahony 22-hadovy pasynak. Padčas niejkaj sprečki pačałasia bojka. Maładziejšy paśpieŭ nanieści ajčymu śmiarotny ŭdar pa hałavie.

Alaksandr byŭ aryštavany i z taho času znachodzicca ŭ śledčym izalatary.

U kancy studzienia musić adbycca sud nad im — papiaredniaje pasiedžańnie było pieraniesienaje praz chvarobu sudździ. Susiedzi pierakananyja, što pryčynaj kanfliktu stała kvaternaje pytańnie. Dźmitryj raskazvaŭ im, što Alaksandr nieadnarazova patrabavaŭ pradać kvateru i addać jamu jahonuju dolu. Parazumiecca jany tak i nie zdoleli...

Pra toje, što ŭ Dźmitryja isnavała zaviaščańnie, i pra jahony źmiest, stała viadoma z paviedamleńnia pres-słužby Alaksandra Łukašenki. Akazvajecca,

Rakaŭčuk dadatkova ŭkazaŭ, što choča pieradać svaju kvateru va ŭłasnaść dziaržavy.

U jaho była dačka ad pieršaha šlubu, ale adnosiny jany nie padtrymlivali. Susiedka Dźmitryja ŭzhadvaje, što jon kazaŭ joj pra składzienaje zaviaščańnie i pra jahony źmiest, adnak jana vyrašyła, što toj žartuje. Rakaŭčuk-starejšy ž pakłapaciŭsia, kab kvatera nie dastałasia pasynku.

Tak ci inakš, nieŭzabavie na Bresckaj, 76–66 źjaviacca novyja žylcy. Pavodle rasparadžeńnia Alaksandra Łukašenki,

kvateru atrymaje siamja invalidaŭ ci šmatdzietnaja siamja.

Jahor Marcinovič, fota Siarhieja Hudzilina

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH