Alaksandar Łukašenka hromić KDB.
Što stała pryčynaj razhromnaj krytyki KDB, što prahučała ŭ čaćvier? Stužki Makara? Skandalny napad na Zianona Łomacia na minułym tydni? Žadańnie asłabić i dyskredytavać strukturu, jakaja zastavałasia svajho rodu dziaržavaj u dziaržavie ŭ scentravanaj na prezydenta systemie? Fakt zastajecca faktam: Łukašenka paddaŭ Kamitet źniščalnaj krytycy. Z čekistaŭ vy pieratvarylisia ŭ pastuchoŭ, skazaŭ u tvar kadebistam Łukašenka. I zahadaŭ tranślavać heta na ŭsiu krainu.
Čutki pra adstaŭku Sucharenki chadzili daŭno, tamu vypadak z Łomaciem, napeŭna, staŭ tolki zručnaj nahodaj. "Inšych centraŭ siły ja nie paciarplu", — zajaviŭ Alaksandar Łukašenka kahebistam.
Nahadajem, što ŭ minuły čaćvier, roŭna ŭ toj dzień, kali KDB tryjumfalna abvieściła pra vykryćcio cełaj špijonskaj sietki, u Mahilovie supracoŭniki KDB na čale z aficeram Rady Biaśpieki źbili staršyniu Kamitetu dziaržkantrolu Zianona Łomacia. Bolš za toje, jany byli pieraapranutyja ŭ milicyjantaŭ.
Vykarystoŭvajučy jak nahodu pradstaŭleńnie na pasadzie novaha staršyni Kamitetu, hienerał-majora Jurja Žadobina, byłoha načalnika słužby achovy prezydenta, Alaksandar Łukašenka rezka skrytykavaŭ usio kiraŭnictva KDB. "Na nižejšych uzroŭniach jość sumlennyja ludzi, ale heta nie datyčyć tych, chto siadzić u hetaj zali".
Kiraŭnik dziaržavy ŭskosna paćvierdziŭ versiju pra kanflikt pamiž KDB i Ministerstvam unutranych spravaŭ.
«Užo siońnia na peŭnych sajtach u internecie, roznyja žoŭtyja medyi musolać fakty vašaj supraćpraŭnaj dziejnaści. Heta tyčycca i staršyni Dziaržkanrolu Zianona Łomacia, i inšaha. Miarkuju, u miežach kryminalnaj spravy hieneralny prakuror, ciapierašniaje kiraŭnictva KDB i MUS raźbiarucca», – skazaŭ Alaksandar Łukašenka.
Jon adkryta pryznaŭ «kryšavańnie» kamercyjnych strukturaŭ siłavikami i ŭtojvańnie infarmacyi ab karupcyi. Jon havaryŭ ab tym, što pracaŭładkavańnie ŭ KDB adbyvajecca pavodle znajomstva i kumaŭstva. Jon zajaviŭ pra niazdolnaść zachoŭvać sakrety.
«Apošni čas vyjaviłasia tendencyja da padzieńnia arhanizavanaści j dyscypliny, a taksama da źnižeńnia ŭzroŭniu na ŭsich kirunkach dziejnaści KDB. U šerahu vypadkaŭ heta pryviało da adkrytych pravałaŭ».
Ad novaha staršyni KDB Łukašenka zapatrabavaŭ «za hod vyčyścić kamitet ad tych, chto zasiedzieŭsia».
Raniej na aficyjnym uzroŭni zaŭsiody kazali, što nijakaha kanfliktu pamiž siłavikami niama – tam prosta «pazbaŭlajucca ad niesumlennych supracoŭnikaŭ».
Nie znajšła paćvierdžańnia versija, što Alaksandar Łukašenka źniaŭ Ściapana Sucharenku za sumnieŭnaje vykryćcio polskich špijonaŭ. Kiraŭnik dziaržavy padziakavaŭ kontravyviednikam za «hetuju cudoŭnuju pracu», adnak nazvaŭ jaje ŭsiaho «probliskam».
