U Fiederacyju prafsajuzaŭ Biełarusi (FPB) pakul nie pastupała zvarotaŭ ad rabotnikaŭ drevaapracoŭčych pradpryjemstvaŭ u suviazi z dekretam prezidenta № 9. Pra heta paviedamiŭ načalnik hałoŭnaha pravavoha ŭpraŭleńnia aparatu savieta FPB Uładzimir Šałkovič 28 studzienia napres-kanfierencyi ŭ Minsku.
Pavodle jaho słoŭ, aprača FPB za situacyjaj na pradpryjemstvach drevaapracoŭki sočyć prafsajuz rabotnikaŭ lesu. Adnak i jon nie vałodaje infarmacyjaj pra toje, što pałažeńni zhadanaha dekreta prymianialisia na praktycy, chacia i nie vyklučaje adzinkavych vypadkaŭ prymianieńnia ŭ nastupnym.
Šałkovič miarkuje, što pravavuju acenku dekretu pavinny davać «inšyja orhany».FPB, pavodle jaho słoŭ, raniej vystupała suprać ukaranieńnia dekreta № 29 «Ab dadatkovych mierach pa ŭdaskanaleńni pracoŭnych adnosinaŭ, umacavańni pracoŭnaj i vykanaŭčaj dyscypliny» 1999 hoda, jaki rehłamientavaŭ pałažeńni kantraktnaha najmu. Ciapierašni dekret prosta ŭnios karektyvy ŭ dekret № 29, padkreśliŭ jon.
«My nie vystupali kateharyčna suprać (dekreta № 9), ale spadziajemsia, što praktyka budzie iści pa šlachu prymianieńnia taho zakanadaŭstva, jakoje było da dekreta № 9», — reziumavaŭ Šałkovič.
U kamientaryi jon paviedamiŭ, što viadziecca praca nad prapanovaj kiraŭnika Fiederacyi niezaležnych prafsajuzaŭ Rasii Michaiła Šmakava ab kansalidacyi rasijskich i biełaruskich prafsajuznych sił i vypracoŭcy adzinaha rašeńnia adnosna dekreta № 9. Adnak u jakim klučy viadziecca hetaja praca i na jakoj stadyi jana znachodzicca, Šałkovič kankretyzavać nie staŭ, spasłaŭšysia na toje, što takimi pytańniami zajmajecca nie jaho słužba.
Dekret № 9 pradpisvaje pieravieści ŭsich rabotnikaŭ drevaapracoŭčych pradpryjemstvaŭ na kantraktnuju formu najmu. Daterminovaje skasavańnie kantraktaŭ u pieryjad realizacyi inviestycyjnych prajektaŭ ź inicyjatyvy rabotnikaŭ dapuskajecca tolki sa zhody najmalnika. Admova najmalnika ŭ skasavańni kantrakta moža być abskardžana staršyni abłasnoha (Minskaha haradskoha) vykankama. U vypadku parušeńnia rabotnikami pracoŭnych abaviazkaŭ i zvalnieńnia jany pavinny kampiensavać hrašovyja vypłaty, jakija buduć naličvacca im dadatkova da zarpłaty. Anałahičny pravavy režym praduhledžany ŭ dačynieńni da rabotnikaŭ hienieralnych padradnych arhanizacyj i prajekciroŭščykaŭ, jakija biaruć udzieł u realizacyi inviestprajektaŭ pa techničnym pieraasnaščeńni, madernizacyi i rekanstrukcyi vytvorčaściaŭ arhanizacyj drevaapracoŭčaj pramysłovaści.
