Nadychodziać časy, kali sabrać hrošy na ŭłasny kreatyŭny startap možna nie hublajučy niezaležnaści, a časam navat nie pakidajučy miežaŭ kvatery. U eru sacsietak sponsaram moža być kožny, treba prosta navučycca zaradžać idejami i dzialicca babłom ź inšymi. Kab daviedacca pra toje, jak pry dapamozie sieciva zdabyvać hrošy na realizacyju idei, my sustrelisia z Alaksandram Dziarhajem — pradziusaram mienskaj hiejm-studyi Aterdux Entertainment, adnym sa stvaralnikaŭ pieršaha paśpiachovaha biełaruskaha kraŭdfandynh-prajekta, jaki sabraŭ praz płatformu Kickstarter $ 80 000 na raspracoŭku histaryčnaj rolevaj hulni.
Kraŭdfandynh — heta kali ludzi praź śpiecyjalnyja sajty skidvajucca hrašyma na realizacyju cikavych prajektaŭ, takich jak zapis muzyčnaha alboma, pajezdka dziaciej-sirot za miažu, stvareńnie novaha revalucyjnaha hadžeta dy inš. Kožny čałaviek, jaki achviaruje hrošy, paśla zakančeńnia prajekta moža atrymać uznaharodžańnie, tak zvany «reŭord», jaki, u zaležnaści ad pamieru inviestycyj, varjujecca ad jakoha-niebudź postara na ścianu z aŭtohrafam da zvańnia vykanaŭčaha pradziusara ŭ jakim-niebudź niamieckim art-chaŭsnym filmie. Akramia hetaha, luby čałaviek moža dadać svoj ułasny prajekt i pasprabavać sabrać patrebnuju sumu na ažyćciaŭleńnie ŭłasnaj hienijalnaj idei. Ale važna nie pierabrać z vystaŭleńniem nieabchodnaj sumy, bo čas zboru abmiežavany i, kali prajekt nie źbiraje pryznačanaj płanki, usie hrošy viartajucca virtualnym inviestaram.
Z pradziusaram Aterdux Entertainment Alaksandram Dziarhajem my sustrakajemsia pasiarod pracoŭnaha dnia ŭ adnym ź mienskich sušy-baraŭ. Aterdux Entertainment — nievialičkaja, mienš za dziesiać čałaviek, indzi-studyja dla raspracoŭki kamputarnych hulniaŭ. Legends of Eisenwald, ich kraŭdfandynh-dziecišča, — dla stvaralnikaŭ pieršaja sapraŭdy vialikaja hulnia. Jaje raspracoŭka pačałasia jašče ŭ 2010 hodzie, ale da hetaha času za Aterdux užo značyłasia staramodnaja RPG pad nazvaj Discord Times. Legends of Eisenwald – jaje idejny sikveł, taksama rolevaja hulnia pra Siaredniaviečča z fentezi-elemientami, ale bolš surjoznaja i pradumanaja.
Praciah čytajcie pa hechtaj spasyłcy.
