Nadzvyčajnyja zachady biaśpieki, paraŭnalnyja chiba z spravaj ab terakcie ŭ metro, pryniatyja ŭ mienskim Domie pravasudździa, dzie treci tydzień u zakrytym režymie prachodzić praces nad hetak zvanaj bandaj «Pasiałkovych».
Farmalna praces prachodzić u Mienskim haradzkim sudzie, ale dla jaho vykarystoŭvajuć zalu ŭ Domie pravasudździa, bo «ŭ haradzkim sudzie niama adpaviednych umovaŭ», patłumačyŭ 19 lutaha na presavaj kanferencyi namieśnik staršyni Viarchoŭnaha sudu Valer Kalinkovič.
Usiaho sudziać 10 čałaviek, jakich abvinavačvajuć u razbojnych napadach, a taksama ŭ hvałtoŭnych dziejańniach, čym i tłumačycca zakrytaść pracesu.Bolš nijakich padrabiaznaściaŭ Kalinkovič nie paviedamiŭ.
Maski, aŭtamaty, dadatkovyja bojeprypasy
U pačatku lutaha karespandent «Svabody» ciaham niekalkich dzion bačyŭ na pieršym paviersie Doma pravasudździa, jaki ličycca terytoryjaj Leninskaha sudu, specnazaŭcaŭ u čornych maskach. Vajskoŭcy byli ŭzbrojeny niezvyčajnymi aŭtamatami z daŭhimi stvałami, mieli ŭ admysłovych kišeniach dadatkovyja bojeprypasy i zbroju. Hetyja ludzi dziažuryli ŭ kalidory, kali pobač išoŭ zakryty praces. U toj ža čas u dvary Doma pravasudździa stajali dva aŭtazaki, jakija pryvozili padsudnych na praces. Admietna, što ciaham usiaho pasiedžańnia milicyjanty asobna achoŭvali i hetyja aŭtazaki. Infarmacyju pra praces u sudzie atrymać nie ŭdavałasia. Advakaty, jakija ŭdzielničali ŭ pracesie, admaŭlalisia nazvać svaje proźviščy i proźviščy abvinavačanych. Śviedki, jakija prachodzili na praces, nie kantaktavali z žurnalistami. Na minułym tydni ŭ kalidory Leninskaha sudu specnazaŭcaŭ nie stała.
«Praces praciahvajecca. Mahčyma, tam karotkaterminovy pierapynak, paviedamić nie mahu. Ale praces jašče nie zavieršany», — paviedamiła 19 lutaha supracoŭnica Mienskaha haradzkoha sudu karespandentu Svabody.
Chto takija «Pasiałkovyja?»
«Vidać, za ich iznoŭ uzialisia. Heta była viadomaja banda, ź jakoj źviazanyja braty Łohinavy, viadomy kryminalny aŭtarytet Barada, jaki trymaŭ mienskuju złodziejskuju kasu j źnik, jak źnikli złodziei ŭ zakonie Ščaŭlik dy inšyja.«Pasiałkovych» usich pierałavili i pasadzili ŭ siaredzinie 2000-ch hadoŭ, ale niekatoryja ich spravy pačali znoŭ uspłyvać. Viałosia novaje raśśledavańnie i, vidać, sprava dajšła da sudu», — prakamentavaŭ «Svabodzie» Siarhiej Sacuk, jaki jak žurnalist sprabavaŭ daśledavać dziejnaść kryminalnych hrupovak Biełarusi.
Pavodle MUS, hrupoŭka «Pasiałkovyja» asabliva aktyŭna dziejničała ŭ 2001 hodzie, ale braty Łohinavy stali viadomyja na niekalki hadoŭ raniej.Heta Alaksandar Łohinaŭ u 1998 hodzie ŭ načnym klubie «Maks-šoŭ» paraniŭ ź pistaleta chakiejnaha trenera Michaiła Zacharava i achoŭnika klubu. Viadoma, što śviedkam incydentu staŭ starejšy syn Alaksandra Łukašenki Viktar, jaki byŭ hościem klubu.
Što da Hienadzia Łohinava, to spačatku jon zajmaŭsia lehalnym biznesam, ale potym, pavodle dadzienych MUS, staŭ zarablać kryminalnym pornabiznesam dy zaniaŭsia admyvańniem hrošaj. Dziela hetaha pry ŭdziele byłoha kursanta Akademii MUS Barysa Rubackaha ŭ Baraŭlanach pad Mienskam byŭ źniaty katedž, dzie pracavała hrupa prahramistaŭ. Pavodle śledčych, na hetym biznesie Łohinaŭ i jahonaja hrupoŭka zarabili kala 5 miljonaŭ dalaraŭ. Ale nia hrebavali jany j zvyčajnymi vykradańniami ludziej z dalejšym «vybivańniem» ź ich hrošaj u lesie. U 2004 hodzie Hienadź Łohinaŭ byŭ pryznany sudom vinavatym u vykradańni ludziej, rabaŭnictvie, machlarstvie i stvareńni złačynnaj hrupoŭki. Da niadaŭniaha času jon adbyvaŭ pakarańnie ŭ kalonii ŭ Navapołacku. Čamu im znoŭ zacikavilisia pravaachoŭniki?
Svoj u svajho hrošy skraŭ
Jak pisała u 2011 hodzie internet-vydańnie «Ježiednievnik», nadoječy ŭspłyło nieardynarnaje złačynstva — vykradańnie ŭ pačatku 2000-ch hadoŭ viadomaha ŭ kryminalnym śviecie machlara z metaj vymahalnictva hrošaj.Pavodle śledztva, da hetaha złačynstva mieŭ dačynieńnie Hienadź Łohinaŭ. Chutka aperatyŭniki zatrymali čatyroch čalcoŭ hrupoŭki, jakim raniej udavałasia paźbiehnuć adkaznaści. Heta byli dva biespracoŭnyja, a taksama instruktar pa sporcie «Habrejskaha kulturnaha tavarystva «Emuna» i barmen kaviarni «U Puntusa», jakaja naležała viadomamu spartovamu treneru. Naziralniki nie vyklučajuć, što mienavita hety epizod staŭ składnikam novaj kryminalnaj spravy suproć Hienadzia Łohinava i reštkaŭ jahonaj złačynnaj hrupoŭki. «Zakrytaść» pracesu admysłoŭcy tłumačać tym, što ŭ spravie fihurujuć epizody, źviazanyja ź dziciačymi parnasajtami.
Varta nahadać, što ŭ minułym hodzie pravaachoŭniki zajaŭlali, što «prychłopnuli» adrazu niekalki padpolnych parnastudyj. Mahčyma, jany niejak źviazanyja ź ludźmi z hrupoŭki «Pasiałkovych», — miarkuje žurnalist Siarhiej Sacuk.
