Čavesa zabalzamujuć, «jak Lenina», pachavańnie adkładajuć na siem dzion 28

Ułady Vieniesueły pryniali rašeńnie zabalzamavać, «jak Lenina», cieła pamierłaha prezidenta Uha Čavesa. Jaho raźmieściać u muziei revalucyi, paviedamiŭ u čaćvier vice-prezident Nikałas Madura, jakoha Čaves vybraŭ u jakaści svajho pierajemnika.

«Cieła Čaviesa budzie zabalzamavanaje, kab jaho možna było ŭbačyć viečna ŭ šklanoj pachavalnaj skryni», — pryvodziać słovy Madura vieniesuelskija ŚMI.

Paśla balzamavańnia cieła Čaviesa budzie pieraniesiena ŭ Muziej revalucyi ŭ Karakasie.

Pakul ža ŭłady pryniali rašeńnie padoŭžyć termin raźvitańnia z Čaviesam, jaki pavinien byŭ zaviaršycca ŭ piatnicu.

«Kamandante možna budzie ŭbačyć jašče na praciahu siami dzion jak minimum, kab narod zmoh zrabić heta biez jakich-kolviek abmiežavańniaŭ:

na samaj spravie, ich miljony, i my chočam, kab kožny achvotny moh jaho ŭbačyć», — cytuje Madura ahienctva RIA «Naviny».

Raniej ułady Vieniesueły zajaŭlali, što pachavańnie Čaviesa projdzie ŭ piatnicu. Adnak u čaćvier ministr suviazi i infarmacyi Vieniesueły Ernesta Viljehas zajaviŭ, što za čas, jaki zastaŭsia dla raźvitańnia nie ŭsie nie paśpiejuć zajści ŭnutr Vajskovaj akademii, dzie znachodzicca cieła. «Heta niemahčyma navat z čysta matematyčnaha hledzišča», — padkreśliŭ jon.

Na dumku analitykaŭ, u rašeńni Madura jość i vybarčyja matyvy.

Prezidenckaja kampanija budzie doŭžycca mienš za miesiac, tamu padaŭžeńnie raźvitańnia z Čavesam pavyšaje jahonyja šancy na pieraabrańnie. Palityčnaja dyskusija adnovicca tolki paśla pachavańnia, a ažyjataž vakoł cieła paspryjaje mabilizacyi elektaratu Čavesa.

U čaćvier pra svajo rašeńnie lacieć na pachavańnie abvieściŭ i Alaksandr Łukašenka, choć pierad tym, u sieradu, było zajaŭlena, što biełaruskuju delehacyju ŭznačalać Šejman i Siamaška.