Chłopiec z Bresta asudžany na čatyry hady za arhanizacyju niezakonnaj mihracyi 2

Sudom Bresckaha rajona 12 sakavika byŭ vyniesieny pryhavor 28-hadovamu Vitalu Kaŭšu za arhanizacyju niezakonnaj mihracyi.

Jak paviedamiŭ staršy pamočnik prakurora Bresckaha rajona Michaił Bułyhin, jaki padtrymlivaŭ dziaržaŭnaje abvinavačańnie pa spravie, sudom ustanoŭlena, što Koŭš pavodle papiaredniaj zmovy ź inšaj asobaj, kryminalnaja sprava ŭ dačynieńni da jakoj vyłučana ŭ asobnuju vytvorčaść, z metaj niezakonnaj mihracyi zamiežnych hramadzian na terytoryju Polščy spłanavali i arhanizavali niezakonny ŭjezd u Biełaruś z Rasii vaśmi hramadzian Indyi. Inšaziemcy prybyli na terytoryju Biełarusi 6–7 maja 2012 hoda. Paśla hetaha hramadzianie Indyi byli pieraviezieny ŭ viosku Ciuchiničy Bresckaha rajona, dzie było arhanizavana ich ukryvalnictva ŭ domie pa miescy žycharstva Kaŭša.

Pamiž siomaj hadzinaj 14 maja i pieršaj nočy 15 maja hramadzianie Indyi byli dastaŭleny ŭ lasny masiŭ blizu zastavy «Cierabuń», dzie Koŭš ź inšaj asobaj zabiaśpiečyli nielehałaŭ rečavymi miaškami i nieabchodnymi prystasavańniami dla niezakonnaha pierasiačeńnia miažy.

Za stvały dreŭ byŭ zamacavany mietaličny tros, paśla čaho z vykarystańniem mantažnych pajasoŭ było ažyćcioŭlena pieramiaščeńnie hramadzian Indyi nad sihnalizacyjnym kompleksam dla dalejšaha nakiravańnia ŭ Polšču. Cieraz biełaruska-polskuju miažu takim čynam było pierapraŭlena siem indyjcaŭ, adnaho parušalnika zatrymaŭ pahraničny narad. Zatym byli zatrymany astatnija hramadzianie Indyi.

Sud Bresckaha rajona pryznaŭ Kaŭša vinavatym va ŭčynieńni złačynstva, praduhledžanaha č. 2 art. 371–1 Kryminalnaha kodeksa (arhanizacyja niezakonnaj mihracyi),

i pryhavaryŭ da čatyroch hadoŭ pazbaŭleńnia voli z adbyvańniem pakarańnia ŭ papraŭčaj kałonii ŭzmocnienaha režymu z kanfiskacyjaj majomaści.

«U sudovym pasiadžeńni Koŭš svajoj viny nie pryznaŭ i zajaviŭ, što nie ŭčyniaŭ hetaha złačynstva. Jaho vina była paćvierdžana sukupnaściu sabranych pa spravie dokazaŭ. Na padstavie ich byŭ vyniesieny prysud», — adznačyŭ Bułyhin.

Pryhavor nie nabyŭ zakonnuju moc i moža być abskardžany.

Jak raniej paviedamiŭ BiełaPAN pravaabaronca Raman Kiślak, hramadski aktyvist Vital Koŭš udzielničaŭ u šerahu palityčnych kampanij u Breście. 16 kastryčnika 2006 hoda jaho zatrymlivali ŭ abłasnym centry jak udzielnika akcyi salidarnaści z palitźniavolenymi. U śniežni 2010 hoda jon byŭ naziralnikam na prezidenckich vybarach.

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH