Pradajecca hraviura «Abłoha Bresta» 7

Na internet-aŭkcyjonie ebay.de vystaŭlenaja na prodaž hraviura Eryka Dalbierha «Abłoha Bresta 1657 hoda». Pamier pałatna — 33,5×51,0 sm, a samoj hraviury — 26,0×47,0 sm. Cana — 279,99 jeŭra. Sama hraviura pachodzić z knihi Samuela Pufiendorfa «Rebus Karła Ch», vydadzienaj u 1696 hodzie.

Paśla Kiejdanskaj unii vojska niekatalickich chaŭruśnikaŭ Šviecyi pačało zachoplivać katalickija ziemli i majontki VKŁ. Brest byŭ uziaty ŭ abłohu 8 maja 1657, a apieracyjaj pa abłozie kiravaŭ asabista karol Karł Ch. Abaronaj Bresckaha zamka kiravaŭ kaštalan, doktar teałohii Mielchijor Stanisłaŭ Savicki.

Aŭtar hraviury — vydatny šviedski mastak-batalist, hienierał-hubiernatar Livonii Eryk Dalbierh. Jak piša Andrej Katlarčuk u knizie ««Šviedy ŭ historyi i kultury biełarusaŭ», Dalbierh u 1657 hodzie apynuŭsia ŭ Breście jak zakładnik. Mienavita jon pravioŭ ahitacyju siarod niamieckich žaŭnieraŭ-najmitaŭ, zrabiŭ płan zamka i paspryjaŭ dobraachvotnaj zdačy Bresta šviedam 23 maja 1657.

«U svaim dziońniku Eryk Dalbierh zanatavaŭ, što bresckija mury naležać da najlepšych abarončych zamkaŭ Jeŭropy», — piša Katlarčuk. Unikalnaść hraviury ŭ tym, što heta adzinaja detalovaja vyjava staroha horada, uščent razburanaha rasijcami ŭ XIX st. padčas pabudovy fartecyi.

U nabyćci hraviury vykazali cikavaść niekalki biełaruskich muziejaŭ, chacia cana, na dumku historykaŭ, zavyšanaja.

Kopija takoj hraviury ŭpryhožvaje siońnia ekspazicyju Nacyjanalnaha muzieja historyi i kultury Biełarusi.

Rusłan Raviaka

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH