Siońnia ŭviečary paśla adbyćcia 15 sutak administracyjnaha aryštu vyjšli na volu Pavał Sieviaryniec, Alaksiej Šein i Alaksandar Čarnyšoŭ.
Nahadajem, što Sieviaryniec i Šein byli zatrymanyja 23 lipienia niedaloka ad stancyi metro «Puškinskaja». U palitykaŭ znajšli niekalki dziasiatkaŭ ulotak pryśviečanych 17‑j hadavinie pryniaćcia Deklaracyi ab dziaržaŭnym suverenitecie. Sud pryhavaryŭ Sieviarynca i Šeina da 15 sutak aryštu. Chłopcam inkryminavali art. 23.24 novaha Administracyjnaha kodeksu: zakliki da praviadzieńnia niesankcyjanavanaj akcyi. Alaksandar Čarnyšoŭ byŭ taksama zatrymany 23 lipienia i atrymaŭ 15 sutak.
Sustreć maładych ludziej na Akreścina pryjšło kala saraka čałaviek. 15 dzion tamu chłopcaŭ zatrymali a 20.30, ale ludzi našyja vučanyja, tamu sabralisia pad murami specpryjomnika‑raźmierkavalnika zahadzia.
Ź viadomych ludziej pryjšli Alaksiej Janukievič, Alaksiej Michalevič, aktyvist Ruchu «Za Svabodu» Alaksiej Kavalec, palitolah Aleś Łahviniec. Było bahata žurnalistaŭ, maładafrontaŭcaŭ.
Sieviaryncu adrazu ŭručyli knihu «Listy ź lesu», što vyjšła ŭčora ŭ seryi «Kniharnia «Naša Niva». Jon adrazu staŭ razdavać prysutnym aŭtohrafy. Pa słovach Paŭła, vychad knihi dla jaho staŭ siurpryzam.
Miž inšym, na sutkach Pavał, Alaksiej i Alaksandar siadzieli ŭ roznych kamerach. Siońnia taksama vyjšaŭ na volu moładzievy aktyvist Siarhiej Klujeŭ, jaki atruciŭsia na Akreścina turemnaj ježaj.
