Biełaruś vystupiła ź inicyjatyvaj supolnaj baraćby ź inšadumstvam u siecivie. Prajekt adpaviednaha pahadnieńnia kiraŭniki ministerstvaŭ zamiežnych spraŭ dziaržaŭ-čalcoŭ SND padpisali ŭčora va Uźbiekistanie. Havorka moža iści nie tolki ab baraćbie z kibermachlarami, ale i ab supolnym procidziejańni sprobam destabilizacyi režymaŭ pry dapamozie infarmacyjnych technałohij.
Kiraŭniki ministerstvaŭ zamiežnych spraŭ 11 krain SND sustrelisia ŭčora ŭ Taškiencie, kab abmierkavać paradak dnia pasiadžeńnia kiraŭnikoŭ uradaŭ dziaržaŭ - čalcoŭ Sadružnaści, jakoje adbudziecca 31 traŭnia ŭ Miensku.
Biełaruś na sustrečy ŭ stalicy Uźbiekistana pradstaŭlaŭ ministr zamiežnych spraŭ Uładzimir Makiej.
Adnym z klučavych dakumientaŭ, uchvalenych udzielnikami, staŭ prajekt kancepcyi supracoŭnictva ŭ sfery baraćby sa złačynstvami, što ździajśniajucca z vykarystańniem infarmacyjnych technałohij. U inšych abjadnańniach na postsavieckaj prastory - ADKB i ŠAS - tema infarmacyjnaj biaśpieki ŭžo bolš za paŭtara hodu źjaŭlajecca adnoj z pryjarytetnych.
Krynica ŭ vykankamie SND rastłumačyła, što paśla pryniaćcia kancepcyi na ŭzroŭni premjer-ministraŭ budzie vypracavanaja kankretnaja prahrama dziejańniaŭ. U jaje, u pryvatnaści, pavinny ŭvajści zachady supracoŭnictva ŭ supraćdziejańni kibermachlarstvu (najpierš u bankavaj sfery), chakierstvu i padrobcy dakumentaŭ. Baki nie vyklučajuć i supolnych dziejańniaŭ dla praduchileńnia vykarystańnia internetu ŭ metach destabilizacyi režymaŭ. Ź inicyjatyvaj raspracoŭki takoj kancepcyi vystupiła Biełaruś.
